之前影過都幾悶,冇乜速度感純粹影姿勢,而花式好多都係相同,今次要試吓慢快門增加啲可觀性.
首先係單人組,就咁坐喺度嗰啲唔影喇,先影倒立既,由於要顧及平衡,車速都好慢,為咗增加效果,我將快門下降到1/30秒,影起來又唔係好難影.
雖然坐喺度,但我見啲手矇得幾好睇.
之後到最難搞既四人組,啲車穿來穿去好難有重點,原本睇中一個動作係一個人做中心,另外三個人繞住佢轉,好可惜嗰吓動作唔郁個人係背住我.最後只有這個排排坐動作比較好啲.
影雀一向器材門檻太高,今次呢個團話200mm都夠,當佢作大,咁我有300mm都勉強夠呱?而且佢有長尾壽帶,平時唔容易見到.去到好多人,個架步係有個大鳥籠,前面係園景,中間係池塘,後面就係座位,朵荷花距離好近,不過200mm真係要坐第一排先得,300mm可以中排,600mm就可以後座.
壽帶唔會咁得閒特登飛出來畀你影,鳥場有位大叔下身着晒防水衣幫大家放蜻蜓,佢行開冇耐雀就會飛落來,咁樣影真係爽,唔駛得個等字.壽帶長尾係好靚.
原本有諗過帶100-400mm,最後帶咗300mm,好彩係咁,當日微雨陰陰天,開盡F2.8都要過千ISO先有1/1600秒快門.白色壽帶比較小飛落來
影完低位仲有高位,之後就到午餐,都叫做正常團餐,唔駛捱飯盒.
熟架步既人三扒兩撥就食完,原來太陽鳥飲水開壇,失咗先機又係第二排,太陽鳥好細隻,第一排距離真係觸手可及.好易影,基本上飲水時係好定.
跟住燈籠花換成大紅花,呢個時候仲落埋雨,既然咁定,我想影大隻啲可以裁小啲就加咗1.4x增距,快門下降到1/320秒,影飛緊既雀來講係超慢,居然又得喎,旁邊既人仲話用到1/125秒都得.
又有消息隔離有斑魚狗爆水捉魚,死火,個天好暗,影啲咁動態既嘢,冇計,只好夾硬谷ISO,光圈開盡,快門1/1000秒,ISO要去到4000.雖然係咁依然張張都炒晒,最後,居然有一張可以,唔駛食白果.呢篇網誌好耐之前就寫咗,後來鏟咗因為有人話咁樣係虐鳥,不過既然都影咗就照出啦.藉口自己去了動物園.
呢排成日落雨真係好悶,難得有一日好小小天可惜中午又有嘢做,燒賣就燒賣,食完晏接近兩點先出發,只好近近地又去山寮.
預咗食白果結果又有啲運,一去到祭壇已經有兩個人,原來佢地話有大二尾蛺蝶出,大二尾就見唔到,不過側邊有隻青鳳,青鳳多數停地下,小見停在樹枝上,影咗先講.
仲諗住只係攝吓時間,估唔到祭壇都有嘢影,可惜唔係大二尾,只係忘憂,呢個位已經影過,而且背景開始暗,冇太大興奮.
光線開始變差,走去出面睇睇,蝶就冇喇,蟲蟲都好,成身鋸齒,畀佢桔到肯定好痛.
又係時候講拜拜,路上竟然有嘢飛過,哎呀,係黃粉交尾,見過幾次都冇一次影到,硬係停埋晒啲古古怪怪位,今次都唔例外,大背光,不過叫做低位,唔駛影到吊晒手,可惜冇光到啲色怪怪地.
只能在觀眾席影,不準到池邊,興趣不大,但落雨又冇乜地方好去就是但.
唔知好彩定唔好彩,容許影相既觀眾席前排座位比較低,可以唔駛淨係影背脊,但佢喺泳手既左面,捷泳的話多數人都係右手面換氣的,冇錯可以等回程嗰陣影,不過多數都散晒,只影到一個人,尤其依家個個都幾啖氣就游晒一個塘,幸過地我遇到一個左面換氣的,咁啱又畀我影到.
想影起跳但個個都想影,好位已經被放晒腳架,唯有蛙泳原來在對面起跳先有得影,平時見人起跳都係會跳高小小再跌入池中,咁應該跳得比較遠,不過今日既運動員全部都係直插池面,冇咗高空停頓嗰吓,谷到1/1000秒都有小小矇.
蛙泳好易影, 因為唔準潛泳的,每一吓前進都要伸個頭出水畀我影.
背泳仲易,成程塊面都係向上,不過我想就到兩個人隻手一樣角度,咁就要靠啲運氣.其實我一心入來係想影背泳向後起步嗰下,無奈啲位一早冇晒,點解冇蝶泳?因為嗰日比賽係冇囉.
想去好耐,不過啲專車時間唔係幾好,上山兩點半尾班車,而且得十幾個位,上唔到就大鑊,落山尾班車六點,影唔到夜景,卒之又用最原始方法...........就係行上去.
三百多米既高度加上三十幾度高溫,行到半死,入到去走到最高既三樓,個景望出去真係超靚.可惜六點就關門,打算去旁邊草地影夜景,點知又話維護不準進入.
行出出面影下座建築物.
冇計要另搵出路,旁邊有一個玩滑翔傘既地方,又寫住不準進入,問玩既人可唔可以入去睇睇,佢話OK,個景就冇上面咁靚喇.都叫可以啦.
另一方向可以影到工地.可惜到六點半左右,主持人又話要鎖閘,要清場......
其實閘旁邊有一個位只係幾棵樹拉咗啲膠帶,有掙扎過等啲人走晒後捐入去,不過寫住進入後果自負,喺香港我就照入架喇,大陸就驚畀人捉去勞改,就算屈錢都唔好啦,結果係走咗去上來既樓梯搵個窿影埋個夜景就算喇.
