再影室內賽艇

應該有幾年未影過.不過今次唔係第四擊,Sony用晒EVF之後影pan鏡難度高咗.雖然我最後都刻服到,但講效率一定唔夠OVF咁實在.室內賽艇要慢快門,唔駛高ISO,對焦都係對定先,唔駛追焦.運動員拉一下得一個機會,又唔駛高速連拍,最啱就係攞翻部古董A700出來影.

雖然精彩既比賽都會壓軸,不過我都一早就來,襯冇乜人拍攝位置可以自由啲.呢場竟然只得一個人參賽,你睇佢幾輕鬆,當晨運 @@

雖然個場好大,好多人比賽,但影到側面既只有兩個位.一個左,一個右,左面當電視台來咗之後超多人.已經冇可能再影,我因為支17-50mm死咗,侷住用定焦50mm影,不能夠全貼欄杆,有時啲手機黨會走去我前面影.相比起影單車,室內賽艇不停有機會,照理係容易啲,但速度冇單車咁高,變咗要更慢快門先有效果.終於用到1/40s,比影單車時用1/80s慢一半.失敗率蠻高的.其實越尾段啲人越辛苦越有效果,但係要喺嗰段時間成功先得.否則又係好似晨運咁 XD

終於有張表情比較對勁的.其實邊個位置影都有啲關係,向前嗰吓未出力,唔影,費事嘥電,拉後既頭段速度未夠快,都係唔影,尾段其實都係慢,用埋好多運動員會搖一搖頭搞到矇咗,所以實際上只有中間一段係拍攝時機.腳未伸直都冇計.

左邊既位竟然有空位,襯冇人又過去影吓等啲相唔駛淨係得一邊.此時已開始接力賽,接力既運動員會坐喺側邊等,不過有啲肉緊既會在旁邊打氣,直頭遮晒玩緊嗰個,所以有空隙影就好盡量影.

淨係得一個動作其實好悶.亦因為接力賽既隊伍越來越肉緊,側邊可以大動作移來移去咁影既空間開始冇,改為去影吓啲人既辛苦表情,哈,俾運動員見到實殺咗我 :P

辛苦到瞓咗喺度,以為佢只係抒發吓情感.後來真係要醫護人員到場,真係搏命.

第三擊

之前兩擊都係用ISO 100影,試部機最靚既畫質,今次輪到惡劣環境測試,高ISO之餘仲要睇睇追焦連拍能力.

多數情況去影跳舞都係鬼咁細個場,用135mm會長得滯,侷住用85mm甚至50mm.咁照計數135mm用在全片幅該啱啱好.點知就係啱啱撞着剛剛,竟然係大場,135mm變咗唔夠長.........冇計,只好等啲運動員走埋來先影.平時人多場面混亂我多數影半身,一來特寫啲等人知道你影乜,二來影大啲背景可以化啲.今次個場大,人小小我反而影多咗全身.

全片幅梗係要試吓高ISO,A77我盡可能限制在ISO 1250或以內,真係好需要先用1600.全片幅一般說法係可以用到6400.可能係超多像素既關係,我就覺得唔係好掂.最多接受到3200,咁其實都好好用.今次就決定用2000等快門可以去到1/400s.比較快既動作都影到.買機有時真係會送技術,高ISO係幫好多的.我見好多人都係買部勁機,係咪都ISO Auto四,五千咁影.解決咗好多快門唔夠快既問題.

影wide啲反而影到跳起的動作,平時多數俾我搞到出咗界.水能載舟,亦能覆舟.全片幅高ISO勁,像素又高,裁多啲都OK.結果我見到好多人影運動就係高ISO加快快門,細光圈加長景深等對焦可以求其啲,用中間一點單次對就算,影到細細粒之後先裁相構圖.見過有人出埋三腳架用快門繩影@@.

難得有人走咁近,都影翻張半身先.背景真係化到好化.新機有一個好大缺點,就係存相好慢.影完要等一等先睇到相.已經用到最快既卡,之前想買張快三倍既,點知原來係唔支援的.

除咗單點對焦外,相機有所謂區域對焦(即係用多幾點),甚至用晒所有對焦點.兵慌馬亂既時候都用得過架.雖然未必係對中你想要既位置.但當目標細既時候好多時都係得啖笑,通常都會影到好sharp既.......背景.新機呢方面表現比較合理,真係見到啲對焦點對緊前面既物體.

頒獎時間,去到體育館尾,135mm都唔夠長,我試了一下APS-C模式,簡單來講即係裁相.裁完都仲有1700萬像素,已經高過A700.真係可以兩用,最重要係對焦超準,隨便一按就搞掂,A77的話就冇乜信心,可能搞兩搞又要十倍放大喇.

APS-C模式其實除咗可以放大啲睇之外,係冇乜實際作用的,自己裁相仲大彈性,起碼唔會出界.我平時影到稍為細粒都會唔要,不過呢吓踢腳幾難得.就破例一次.

未出擊,先出血

近排成日天黑黑,又冇乜公開活動,變咗試唔到機,最直接方法就係俾錢影model.影人要出動閃燈,諗住唔轉會可以用翻舊燈啦,係得既,Sony雖然轉咗腳,但加轉換器就用得翻舊燈.不過.........個轉會器好單薄,一粒塑膠骰仔拖住咁大支閃燈給人好恐佈既感覺.好似輕輕推一推個熱鞍就會爆咁.龜毛的我結果又要出血買多支燈.

一係唔買,一係買支最大火數既.原本諗住買支副廠算數,因為聽講Cactus燈內置無線發射及接收,只要買兩支就做到飛燈,唔駛多舊引閃,得全手動輸出都唔緊要,但原來冇高速閃,變咗一出太陽就廢武功,罷了,都係買支原廠算數,原廠今次有個好處係內置LED燈.有時唔方便用閃可以用佢頂吓.唔駛特登帶多支LED燈.

上次影人都發現呢個問題,不過可能太耐冇影又唔記得咗.Sony燈一定要直打先可以用高速閃(唔知其他牌子係咪).我得塊柔光板,一定要燈頭向上,我又唔想祼燈直打,好在天陰,勉強用到F2.5光圈.畫質同淺景深唔計,最大好處係唔駛再同其他人鬥wide.用85mm影全身以往係好難有機會的.實會俾其他用85mm既人遮住.

又影吓有前中後景既三層相.這個位用唔到85mm.只好用50mm,光圈進一步開大到F2.2.我發覺到支50mm係仲sharp過85mm,而且冇乜紫邊.真係想試吓Sigma支85mm有幾勁.不過換就唔會喇.原來A99II一定要原廠鏡先用到外圍嗰啲對比式對焦點.否則就得翻同其他廠差唔多既中間對焦點.大光圈景深淺會幾難用,對焦對個身有時塊面真係會唔多中,由其低抄更明顯.遇到咁情況我會索性放大十倍手動對焦.Sony係小有可以用觀景窗做呢個動作既相機.Liveview的話會令成件事好唔隠定的.呢張如果啲草低啲就好喇,依家前面唔多夠效果.

對焦點分佈會係問題,咁準繩度會係更大問題.唔怕坦白講,用過咁多相機,幾乎冇一部真係靠得住的.Minolta時代搞到要大維修係人都知,但其他機實在都係好飄,時準時唔準.所以我最驚係影頒獎,其他相唔中最多唔要.頒獎相矇咗就真係.........聽講全片幅會準的.特登用中間點對好細既目標試吓.竟然超準而且百發百中,感動到喊.再試其他點,開始有啲飄,但成功率還算高,可惜我最常用既右上角嗰堆就唔多掂.冇計,唯有又係放大十倍.Model可能都好奇怪,呢個人做乜搞咁耐都唔影既?

全片幅第一擊

上次去長洲北眺亭用咗50mm影夜景,事後總覺得空位太多,買咗新機就一於再去用長鏡影翻Tight啲.其實上次我都已經想用長鏡影,唔知係唔係支70-200mm曾經由凳度跳過落地下,光軸有所偏移定係支鏡本身就係咁,硬係冇辦法影到成個畫面都sharp.即使收到F8,甚至F10.今次我決定用定焦鏡影.睇翻上次啲相計計數,需要焦距大約係110mm左右.我冇支咁既鏡,最後方法係用支85mm加個1.4x增距鏡,雖然加增距鏡會令畫質有所下降,但收到咁細光圈應該影響好微.........

影風景其實唔係多試到部相機性能,可以手動焦慢慢影,純粹試畫質.果然定焦係Sharp到整個畫面.整體畫質亦係比用APS-C好.可能係片幅大咗同埋冇低通濾鏡呱?暗位亦比較乾淨.APS-C的話暗位始終有小許顆粒感.執相的感覺更明顯,咪以為淨係推光暗位先會增加雜訊,事實上加對比度,飽和度等都一樣會增加雜訊.全片幅呢方面承受力似乎比較大,落味精可以重手啲.

原本呢一張顏色比較討好,可惜有隻船在畫面中間劃出一條橫線破壞咗.影景有時就係咁.試完影景試乜好呢?要試一試最重要的對焦性能先得.

升級全片幅

Canon或者Nikon用家真幸福,同時間全片幅機都有幾個選擇.Sony就只有一部,而且一路都唔多掂.成日就只有最高像素,由A900開始到A99對焦點都係去晒中間,像素係同期最高(雜訊都係最高),而對焦點就係同期最集中.變咗大光圈影人一係放中間,一係手動對焦.影運動更加只可以乜都放中間.之後就出晒E mount,就算上Sony陣列室都係冇A mount機展示,心想都應該會由得A mount死.點知估佢唔到突然出部A99II.睇spec,終於唔係最高像素,實際上Sony係想最高的,不過俾Cannon 5Ds殺個措手不及.最重要係對焦點分佈終於同對手睇齊,如果計埋對比式對焦,幾乎成個畫面都有對焦點.

跟住就係買定唔買,心梗係好想要,但價錢..........淨機身都等於用緊既A77四倍價錢,咁重唔止,啲wide鏡唔用得,最起碼都要買多支wide鏡,加埋filter,保護貼,相機帶等,真係賣腎都唔掂.不過人一世,物一世.出血就慢慢補翻吧.機身出奇地細,跟A77差不多.

Wide鏡常用,再流啲血都要買埋.蔡司24-70mm太貴喇,而且睇測試其實麻麻地.我都覺得蔡司做定焦就好.平平地Tamron 24-70mm就算,睇測試都唔錯.

裝在機身上好難話唔笨重,但原來冇乜選擇,Sigma有出24-105mm,不過得F4光圈,重點都係好重.至於24-70mm F4既選擇係冇.暫時告一段落,菜單頗複雜,要慢慢研究吓..............

影剷沙

初初影棒球就只係留意擊球手,投手同捕手.啲相都幾千篇一律,就係球員有動作而個波在空中,坦白講都幾悶,有次朋友講起棒球好難影,唔係呱?三種球員都係企定定,對定焦都仲得.個波唔啱位咪試多幾次囉.原來佢係講緊影剷壘.依家已經唔興影嗰三種相架喇,只係冇得影剷壘既時候順便影來充吓數.我又要試吓咁影先得......

真係頗難的.最難就係唔係成日會剷.時間充足既話就咁跑壘,甚至行都得,咁就冇乜好影.諗住影剷壘令我多留意咗比賽流程.通常一壘係唔多會剷的.啱啱打中個波對方好小機會可以短時間接到.慢慢走過去就得,就算個波打得好遠諗住搶埋二壘都係到二疊先剷.可以放心影老式三種相.有收獲,呢個係三壘,不過唔係好夠剷.

今次有飛沙喇呱.又係三壘.點解我會知?因為全場得兩個位俾影相.而影到正面剷既就只得三壘,亦由於太近既關係,200-500mm係會爆框既,我必定要用另一部上住70-200mm既機先影到,所以一睇EXIF我就知係三壘.

呢個係二壘,應該只可能影到側面,只因為佢打側剷,符碌地影到正面.為咗影剷壘,壘上多人既時候我直情放棄唔影老式三相,因為意識到打中個波先用支zoom到四,五百mm焦距既鏡去搵邊個剷壘,搵得到,對得焦來多數都已經剷完.

轉轉位,影擊球距離近咗,同埋頭先個位要影用左手既擊球手先影到樣,如果剷本壘仲可以唔駛影背面.至於影其它壘就麻麻,一壘多數唔剷,三壘太遠,而且二壘同三壘都只影到背面.剷都驚唔夠快,撲啦,可惜只影到背面.冇轉位起碼可以影到側面.

講咗咁耐,點解要剷?搞到成身泥,仲要着白褲,真係唔怕阿媽鬧咩?問題係如果對方執翻個波掟翻壘接到既話就會被out.為咗爭取時間既做法.呢張相就睇到呢個關係,波未接到已經到壘,成功.

呢次就遲咗喇,已經接到波準備掟翻俾投手.

宅一宅去C3動漫

係冇咁大型咁多嘢睇,但係唔駛排隊,陣容都算OK啦,太迫真係頂唔順.

都算落本架,門口咁大個鐡甲萬能俠.最唔好係嗰個圍欄啦,破壞晒成個畫面.原本仲有架1:1戰車架,但睇見貼實佢既圍欄已經冇晒胃口,影完都刪走咗.

有啲模型要買好貴,尤其呢啲聲稱係首辦既灰樣,有錢都未必買得到.不過影相既話就係免費,同圍欄一樣咁乞人憎就係啲玻璃.反光到死,好難補光,只好用高iso加慢快門拚了.

高達係一定要影啦,發光的背景增加了一點太空的感覺,而且唔駛驚背景暗,可以盡情收光圈再用閃燈補光.

發光高達係唔可以補光喇.否則會變咗普通高達,成日話啲小朋友玩具低B,絶招就只係發吓光,出吓聲.其實宅男玩具咪又係一樣 XD

宅男有三單,單眼,單車,單身.我只有一樣,看來都唔係好宅,但係影女仔呢樣好宅既嘢我係幾熱衷.坦白講,除咗唔駛錢影個夠之外,呢啲超雜亂環境影出來既相都係好垃圾吓,背景花到頭暈,我盡量想用支50mm開大光圈整矇佢,但APS-C用50mm真係有難度,個個都鬥wide,走去用50mm既後果就係會俾人遮住,我千方百計走去旁邊冇咁多人既地方,係咁用閃燈閃,終於model都肯望吓我呢面,圓了用50mm影的心願 :P

可能大會都知大家有拍照要求,整咗個櫻花場景去滿足大家.但係太花喇.至多係F4效果,唔得糖水.咁點都好過人山人海做背景既.

又到馬拉松

坦白講,影咗咁多年開始有啲悶.而且年紀大,上橋涷到死唔想再去.揀個最容易影位置參與下就算.灣仔運動場影吓Snap shot,合照等就最好喇,最重要係有厠所,有水飲哦.

呢度主要係影三公里輪椅賽,運動場設施最完善,有長凳可以坐低食個包先影,仲有最最最正就係夠晒光,輪椅速度又慢,肯定有貨交.

輪椅賽話咁快就影完,之後就出翻近會展位置等半馬經過,個天開始光,可以唔駛用閃燈.初初到的都係得一個人,冇乜美感,後來多人但又會好似張張都差唔多……

前年拍過會展附近,知道轉彎有條大斜路幾好影,由於斜路關係,前面跑手唔會遮晒後面,可以影到好多人既感覺.除咗輪椅組,仲有親子組都係運動場出發.不過極hea,大部份都係行多過跑,志在親子.

懶得就懶,唔直接行去維園喇,勁多人迫餐死,除咗上天橋影一兩張好多人既相外就冇乜作為,去翻會展付近影埋全馬就算數,唔明點解係要有架電單車在前幾名跑手前面.唔知會唔會係電動車呢?否則啲跑手係咁吸死氣分分鐘中毒.同埋最緊要係……阻住我 @@

例牌又影吓多人既畫面.平地始終係會遮咗後面,又冇斜路,又冇欄桿爬高小小,舉高部機影就最簡單,不過如果部機冇反mon就盞搞,實係影到歪歪斜斜.

好喇,決定影埋水站就走,個水站擺位好奇怪,應該梗係盡量等運動員攞水之後可以直衝架嘛,但係佢整到斜斜地,變咗運動員要斜出,咁既安排搞到我唔係好敢企佢地旁邊,分分鐘成杯水潑埋來之外,人撞人受傷都似.侷住走遠啲影攞完水嗰吓.乜咁大嘥,飲小小就唔要.

你都唔好得幾多,又係天一半,地一半.

正想走的時候,每年都幾乎實見到佢既鯊魚又出現,OK影埋佢就去翻灣仔坐地鐡走,溫馨提示,千萬唔好諗住銅鑼灣站出,處處封路,肯定有排都迫唔到入維園,天后會快好多.

幾乎每年都有人借呢個盛事求婚.翻到維園都俾我見到一對喎.仲因應大家要求來個Kiss擺拍.其實咁樣係咪真係會增加成功率架?如果被拒絶真係好瘀喎…………

鳳園提早開工

天氣依然很冷,我個人習慣係唔會去影蝴蝶,昆蟲等題材的.多得識了班影蝶發燒友,經常出發又貼出收獲,知道原來都有得影,又有人搞,咁就去吓.

我住得近,好早就到咗,可惜係冇乜用,硬係好似搵唔到嘢影,只係見慣見熟,已經影過好多次既品種.終於都要等到朋友到達,等佢搵到呢隻稀有品種我先開齋,而事實上我跟本唔知係稀有,俾我見到既話會以為係普通斑蝶,可能會唔影添. 想像唔到咁冷天氣竟然有十幾人來咗,結果又係成班人圍住影,角度麻麻,冇所謂啦,好過乜都冇.

蝴蝶其實係有既,出乎意料數量其實唔小,只係見慣見熟,大家冇乜意願按快門,橫掂冇嘢影我又玩下.

呢隻common弄平時真係冇人理啦,我影得幾影居然搞到幾乎排隊咁滯.

接下來就係今日主角蚜灰蝶,由於佢既波點花紋,大家都叫佢做小鳳姐,比手指尾指甲仲要細小小,而且飛起來唔容易見到啲波點,但啲人又分到架喎.真該死,停極啲位都鬼咁高,如果得我一個我就會放棄唔怕架喇,這時就明白點解人地次次有收獲,自己就成日槓龜.竟然有人諗到搬張長凳過來企高影.仲要唔夠高再企上凳背,搵人扶住影.成件事好危險但又好熱血.最後當然又係演變成排長龍.咁既姿勢實在好震,輪咗幾轉先終於有張叫做sharp.但其實咁企都仲未夠高.就唔到平行隻蝶.落住微兩又有小小風,不得不開大光圈,上半部既花紋化晒.

泥涌清水疍

影日出既交通安排真係頗麻煩,除非唔計錢吓吓打的.否則通宵車係冇乜選擇.等到正常車又趕唔到.冬天日短夜長,無聊查一查日出時間,咦,7:10其實港鐡開咗,搭頭班車的話唔係太遠都應該去到.之前見到人地在泥涌影既綠藻加日出好正.但綠藻出現日子唔清楚,只好搏一搏.5:45頭班車出大學再轉小巴.快到唔相信,6:30都未夠就到咗.

綠藻...........係冇既,影日出囉.有山遮住既關係,太陽要成7:30先肯出來,係就係好好天,一粒雲都冇,肯定唔會遮住日出食白果,不過冇雲又好單調,冇得火燒雲,友儕叫呢啲做清水疍.被視為失敗.咁都冇計啦,希望下次來有火燒雲加綠藻吧.

影多張多啲地下既,都係冇乜睇頭,如果地下係綠藻咁就差好遠.唔影日出晏小小來淨係影綠藻得唔得呢?我真係試過,由於水漲關係,會掩過晒啲綠藻,變咗綠藻糖水 XD