再探天際100

上到咁高睇到既景係幾靚既,不過價錢真係離晒地,6月做推廣身份證有……唔記得乜嘢字就可以買一送一(其實都仲係好貴),咁就去多次啦.

上次用衣架遮光法都係覺得好論盡,所以今次淘咗個用吸盤既伸縮衣架用來掛黑布,範圍可以闊好多而且唔駛用一隻手攞住,不過唔知點解硬係見到自己倒影.日落好快就冇,冇時間慢慢搞,影咗至算,今日好好彩個天幾清,記得有次來係乜都睇唔到.有埋火燒天就好,世事冇咁理想.

順便影埋個夜景,見到旁邊有人用可以固定在鏡頭既反光板.有啲人仲大塊得好誇張.睇來好似幾work.後來朋友問佢地邊度買,原來係有得借,即係9.9秒跑去借啦.唔好意思,我地得翻最大嗰隻,啱晒,我就係想有咁大得咁大,結果,證實係冇用既.除非鏡頭貼實玻璃,否則經反光板反射既光線仲多過唔用.即刻俾翻佢用自己方法影,始終去唔晒啲反光.之後當然係影埋幻彩詠香江,好出奇今次只係得兩間大厦有激光出,而且係好散同唔多光嗰隻,影完都唔靚.事後回憶翻我上次係有遮住機背的,自己既方法自己都忘記咗,抵死.