Mega Box影景

一直都有諗法去呢個便捷景點,不過好似除咗隔住商場玻璃就冇乜計.終於得知原來可以喺七樓停車場或者十樓溜冰場外面有位.咁梗係越高越好,點知十樓露台封咗,侷住去七樓.

商場的好處係可以涼住冷氣等夠鐘先上去影,呢個冷門位冇乜人爭唔駛咁早霸位,影完仲可以即刻去商場食飯.景就麻麻啦,要舒服唔要求得咁多.由於圍牆頗高及厚,除非你支腳架可以開到超高,否則細腳架直接放在圍牆上仲冇咁阻.

順便影埋個夜景.

撈埋汁影另一個方向就收工.

利安後山

之前自己去搵,山就搵唔到,只係在長命樓梯附近同埋遠啲既公園度影吓,直至上次企嶺下碰到有人話下午去跟住佢地去先搵到.其實我之前都見到有條山路,不過行行吓唔對路行翻轉頭.雖然上山入口唔係我搵到嗰條路,但都係會行行吓覺得唔對路嗰種.

終於來到山頂,原來好細地方吓,人多啲都冇位企.陰暗地方有幾隻小豹律津蝶,呢種蝶頗大隻同成日見但係好難影,專喱埋暗位仲要係開翼,吓吓要高角度接近真唔容易,不斷追逐下終於等到佢高位合翼,雖然背光都叫做影到.唔攞閃燈喇.陣間錯過咗就冇喇.

目標蝶要下午先會出現,等待期間只好見乜影乜,呢隻弄蝶連交尾都影過,單隻就盡量影大隻啲,欣賞吓佢啲毛.

又有隻唔知乜蝶,睇真啲我好似其實未影過.

目標蝶卒之下午二時半出咗來,聽講係早咗,之前係三點,可惜我都未見到佢已經走咗,之後一直都冇出過來.好彩都有隻綠灰出現,可惜背景比較花,影咗先陣間睇吓會唔會有第二個位靚啲,為咗要影到佢腹部嗰執毛,唔顧得焦平要斜小小,幸好最後夾三張都夠景深.之後就冇之後喇,飛走咗.

再挑戰婆髻山

多年前去過婆髻山都已經好艱辛,可惜嗰次大霧,乜都影唔到就走咗,今年鼓起幹勁再挑戰過.

事實上上次係未去到山頂,因為再上都冇意思,今次能見度幾好,雖然都可以在上次的位置影(都行到好甘),一場來到冇理由唔攻頂,為咗避免行行吓行咗去西天,我放到好慢腳步,出門前飲大量水,上山過程都密密飲水.幾乎虛脫先到頂,火燒天就冇喇,清水疍我都接受既.

呢度個景比較扁,上下好多空位,比較適合裁成16:9做電腦Wall Paper.撈埋個夜景之後就要落山,睇見條路都覺得辛苦,尤其體力已經用到七七八八.好不容易捱到上巴士,之後幾日都唔想再行路.

芝加哥大學

聽個名仲以為係外個地方.其實佢係同香港大學有關係,網上睇到有個位可以影日落,校園裏面都好似幾靚,近日天氣時晴時雨,上山有風險,留在地上安全啲.

一入門口其實就已經係影日落個位,時間仲早,去行吓其他地方先,不過.......度度都欄晒鐵鏈,學院範圍,不得內進.侷住齋等,悶得滯,竟然灟波,個太陽俾啲雲遮住咗,冇計啦,只好就咁影吓.

企嶺下老圍影蝶

次次去企嶺下老圍都係水浪窩落車行過去,中間嗰段路其實冇乜嘢影,今次直接就喺企嶺下老圍落車.原來在村屋旁邊有條路可以直去到公厠位置,以往唔知道要行翻轉頭走.

再次去到上次影飛蛾同毛蟲嗰個位,終於搵到有蝴蝶,仲係未見過,不過個樣灰頭灰腦,冇乜貴氣,應該都係普通嘢,咁我未影過佢又唔點郁,就慢慢影好佢.

行行吓無意中在路邊見到青斑交尾,雖然係Cheap嘢,但交尾都未影過,未準備好佢地居然飛走,仲入埋樹林,好彩我夠眼睇到佢停低位置.唔理咁多放低背包在路邊,爬上樹林斜坡影佢地,非常暗,搞咗好耐,盤算一下應該都影到先離開.點知冇耐喺淺灘又見到佢地,好極,呢度光好多,剛擺好架式,側邊竟然又有幻紫班交尾,位置仲易影,不如影佢先,三心兩意之際,飛走咗去樹頂,都係唔好咁多心,影靚青斑先.

行翻出石屎路,點知又有一對青斑交尾.仲有更神奇既事,又見到一對幻紫斑交尾.我估應該唔係剛才嗰對,以為我眼利,原來係交尾大爆發.

城門河賽艇

賽艇其實幾悶吓,同龍舟差唔多,都係影多船畫面同場比拚.可惜賽艇設計太好,唔駛好似龍舟咁爬到面容扭曲,影出來唔夠刺激,不過今次我想練習慢快門.

由於200-500只可用在舊機,用唔到畫面邊緣既對焦點,侷住重啲都要帶300mm再加1.4x增距.賽事分2000m及1000m,起點係唔同的.冇錯在1000m起點係可以影埋2000m賽事經過既艇,不過要同時影到好多船都係唔好離起點太遠,好易散晒.所以2000m比賽時我就去2000m起點影,終於等到最多人既八人組.

中間有幾場1000m比賽,唔影好似好嘥,於是就行1000m去起點,每場起步間隔10分鐘,真係趕到滿頭大汗,哎呀,竟然係最悶既單人賽.

都係放棄最尾嗰場1000m去翻2000m起點.否則真係會虛脫.由於用到420mm焦距,慢快門係好高失敗率,我只帶咗單腳架,可能三腳架會好啲.雖然慢到1/80秒,都係冇乜搖鏡效果.因為艇既移動實在係太慢,唯一係可以表現到槳既動態.

下午要遷就光線方向要過橋對面,冇咗有頂既座位,曬到變人乾,唯有每場一影完即行100m去翻樹陰.仲有個問題係大會用咗近岸呢邊做下一場等候位,賽事主要用遠處幾條線,焦距都唔係好夠長.如果唔多過三隊的話可直接放棄,慢快門仲可以做出大水花效果.

藍衫呢隊明顯比其他隊伍快,可以做到有小小搖鏡既感覺,水花也較大.

好多人話背光先有藝術效果,但係我好憎啲水爆晒變晒白色.超好彩,決賽幾乎係滿座,用到最近第二條線,影到個人夠晒大.

香港天燈節

在FB見到有呢個活動,其實都知應該流流地,見落晒雨冇地方去就去吓.

大會有個目標係摺紙鶴數量破世界紀錄,我覺得其實幾無謂,呢啲所謂紀錄,只要搵啲冇人做過既嘢去做就得,之後就係大量垃圾.而最重要係跟本唔靚.

除咗樽裝仲有掛裝,包晒膠紙,真係嘥好多功夫,不過離遠睇係就好似窗簾咁囉.

舞台耐唔耐有唱歌表演,不過我冇乜心機睇,一心只想卡個中間位影假天燈.好彩冇乜人用腳架,襯有人行開咗我立即就佔咗個中間位.落雨做成有個水氹,大家都諗住影倒影,我發覺係唔得既,因為水氹裏面好多人做草,不過咁都好,大家要避開水氹唔可以鬥前,變咗可以用長小小焦距影,燈既大細可以比較一致.影完天燈就走人喇.舞台冇乜興趣,早啲翻屋企.

紅鋸情意結

睇翻以前影既紅鋸,清楚係清楚,但全部都歪歪斜斜,硬係唔得四正,雖然龍鼓灘都頗遠,都要去搞一搞佢.

四周都係紅鋸,但肯停個好位既就真係冇,又係歪歪斜斜,搞咗一大輪都係得個桔,不過其他人似乎係珍灰情意結,好快就搵到來影.我自然又拖衫尾唔好執輸.

好喇,終於有紅鋸開翼平放,唔紅既,原來雌性係咁,不過個位都真係好亂.唔合格.

有隻角翅弄蝶,我影咗嗰啲又係歪歪斜斜,今次要認真影靚佢,又係好似紅鋸咁不停郁,而且佢背部彎彎地有啲馳背,唔夾相好難夠景深,但佢不停郁始終唔夠時間,最後翼尖都係清唔到.

突然起哄,原來有罕有蝶,聽佢地講應該係遷粉蝶,血斑型.太瘋狂我唔係好敢去前排影,咁啱停在橋的鐡絲網上,旁邊師兄用300mm正面太近對唔到焦,我就唔客氣喇,有冇覺得個背景有啲怪?其實我大執先整走晒啲鐡線網,功夫所限........

八仙嶺攝影

八仙嶺給我最深印象就係有老師同學生遇過難,我估應該都好難行,所以一路都冇留意實際路線,最近睇You Tube有人介紹.原來路線都好明顯,唔係好險要嗰種,咁諗真啲都係既,帶學生行山冇理由揀啲咁危險既.

初段路都好平緩,不過......好長,行極都行唔完,行咗45分鐘,終於到咗........登山口,一睇路牌,仲有一公里,需要半小時.,而且幾乎全部係樓梯.之後仲要由仙菇峰過去湘子峰,千辛萬苦終上到來.180度都有景,就分開三張影啦,先影船灣淡水湖條堤壩.

之後嗰六個峰就咪搞,睇地圖有條捷徑上純陽峰,唔知險成點,中間位原本諗住最靚.不過影出來又好似冇乜特別.

之後影埋右手面,原本上到頂又係大風到死,諗住又要大光圈,高ISO硬拚,好彩後來搵到個凹入去既位擋咗啲風.呢個位可以見到慈山寺個觀音,如果太陽過小小就好啦,依家只影到小小紅天.

拍攝迪士尼

迪士尼冇耐前重新有翻放煙花.除咗以前去過既花瓶頂,我仲上網留意到竹篙灣咀可以更近距離影,唔駛行咁遠之餘,可以用短啲焦距,又冇咁驚天色唔夠清.

山不高只有117米,我見人由迪士尼站出發,35分鐘就到頂.路程雖唔長,但可能小人行,好多草伸出咗路中心,又有塌樹,有幾處要烏到好低先過到.上到頂一個方向影到迪士尼,另一個方向可以影到竹篙灣既隔離設施,襯天未黑影咗佢先.

跟手要即刻影埋迪士尼個底景,雖然煙花八點半先開始,但到時個天黑晒唔好睇,而且城堡附近會熄燈,畫面會好單調.我帶咗24-70mm同埋135mm來,但最後用咗70mm影,上次去花瓶頂有啲好高既煙花,由於要配合底景冇得改構圖,啲煙花出晒界都冇計.今次影wide啲留翻來裁.最後確定咗好高既煙花係冇咗,早知用135mm影,不過咁有咁好,可以裁唔同大細,先來張比較多景既.

個城堡好似太細,裁多啲,影完用咗大約半個鐘落山,諗住迪士尼啲人走得七七八八,實際係超級多人,搞到車站要人潮管制.捱到出欣澳又要迫多次上東鐡,認真攞命.