鷹巢山自然教育徑

又去懶人地方,入口就在石梨貝水塘附近,全程容易行.

不過影相位得一個,而且好普通,淨係得啲樓.

添馬公園發光玫瑰

花展太迫人,走去影吓死物.這個景其實之前出過,當時冇影.

五點半就開燈,不過唔多睇唔到,天太光,之後天色變暗就開始明顯但天空依然太光,所以先影吓冇天空嗰邊.

終於等到天夠暗,就影張有紅又有藍,最多花既構圖.啲花發光會有光差太大既問題,唔係花爆光就係周圍黑晒,而且因為近既花太近,會有景深唔夠既問題.於是要HDR再加景深合成去處理.由於HDR要不停改光圈快門,好易郁到部相機,我設定咗用包圍曝光同電子快門,要郁既只有對焦環,果然事後連對正都唔駛.

紅色花似乎好易爆飽和度,決定走出啲只影藍花,花小咗但確係易啲出到啲紋.

長征長排頭天池

這個計劃了很久,要好天又要大水退,仲要係星期六或日.總係好難滿足晒所有條件,等了又等,卒之等到九星連珠,龍穴大開之時先成行.網上資料由鹿頸出發來回要五個鐘.加埋我唔識爆林,靠綑邊嗰段要多三倍時間,最後連埋開餐,用咗六個鐘先搞掂.網上話一路跟住荔枝窩方向路牌就得,去到榕樹凹村我都係咁做,越行越唔對路,但手機冇訊號,冇得靠Google map,直至去到高位先發覺去咗鎖羅盆方向,要行翻轉頭,白白浪費咗時間同體力.過程中我係直情搵唔到爆林入口,只係一直綑邊,不過.......都係要爆林,綑邊路線有啲位個地係林林地,除非諗住對鞋行完就唔要,否則都係要爆入側邊小小在樹叢中穿插,唔同既係睇住海岸線,唔會迷路.

好不容易見到架生锈剷泥車,即係冇行錯路同就快到.死火,24mm唔夠wide,唔想玩駁相,終於斜斜地搵到個高位影得晒個天池.因為網上見到既構圖都好扁,我特登帶咗支單腳諗住進一步升高部機.不過睇來唔需要,係好咗啲啲,相信平地用效果會明顯得多,但唔值得攞咁重.影完就好快啲走,要襯住水漲前離開綑邊位.

放相後有去過既人問我係咪水小咗,我估係我影得細咗,再放多張有人比對既,我估都要50人先夠圍一個圈.

公庵山食風

得知要影西部通道全景要上公庵山.搭小巴老人院落車好快就到登山口.路一點唔難行,有人用木板做晒樓梯級,山也不高只係二百多米,但最後一段應該係越野電單車賽道,好多碎沙,頗跣,要小心慢行,最好有勞工手套萬一跣到都唔駛擦傷手.

風好大仲要用到200mm,試咗一陣發覺搞唔掂,快門一長就矇.幸好搵到個草堆凹咗入去擋到風先解決到.Magic hour大約六點四十五分,一般橋樑都係捱到七點就開燈,西部通道係衰啲要七點半,唔係做定功課我都以為佢唔會開燈,肯定七點就走人,依家要捱多半粒鐘.呢四十五鐘都幾難捱,屈在草堆對腳會屈壞,出面又超大風,沙地亂咁走動又危險,侷住係咁郁對手等冇咁涷,時間一到嗱嗱聲影咗就落山.出大馬路的小巴班次好密,等咗一陣就有.

機場櫻花園

早排呢度搞到爆晒人,要人流管制.連Google Map都新增咗呢個地方名,我都襯熱鬧去影吓相思仔.有諗過不如近近地去粉嶺影,但紅花風鈴做背景已經影過,櫻花就未,為免重覆,遠就遠啦.

死火,冇帶帽,天陰陰諗住唔駛戴都得.點知曬到爆,好在搵到個位有遮陰,否則變黑人.代價就係在欄杆裏面,唔怕曬企出面可以近啲.有藍天比陰天死白好得多.

今次用咗300mm加1.4x增距,裁得都幾盡,應該係加2x好啲既,但一冇陽光就會好粗,陰影處反差冇咁大,感覺好雜亂.

想見到多啲櫻花隻相思多數要細隻啲,要有啲取捨.

其實冇乜技術可言,啲相思走來走去,睇清楚姿勢先影分分鐘已經走咗,總之一見有就狂影,構圖其實都冇,我全部係中心點對焦,反正影出來好細粒,後期先慢慢裁啱構圖.

西九偽極光

一連兩次有人叫我去,推咗一次第二次就去啦,反正交通好方便.

Facebook已經好多呢類相洗版,都係冇乜睇頭,比較假,好多人,勉強側小小就到唔好見到好直既投影機光線.

極光既原理就係用噴煙機制造活動投影幕反射光線,用三部投影機播放極光影像.如果風大就會乜都睇唔到,而且就成晚都係咁,冇乜變化,建議帶埋閃光燈玩影人會多啲變化冇咁悶.

星加坡自由行

出境回港終於唔駛檢疫,於是去一轉星加坡探親.

一到機場就有相影,樟宜機場早排加建咗個大漏斗,每晚仲有兩場燈光表現,等餐死原來好流,只係投影啲迪士尼公仔到水柱.我覺得平時着燈仲靚,早知唔駛等.哈,有啲似外星人襲地球既死光炮 :P

上次來唔知有激光表現,今次影翻,頭十分鐘完全冇激光,唔會慳皮取消咗呱?好彩後段係有,不過好弱,仲削過幻彩詠香江.

亞拉伯街有間有個金頂既廟都幾靚,可惜旁邊環境好亂.

最後去咗新知館,其實我唔知佢係乜地方,純粹覺得啲太陽能板配埋日落幾靚,可惜啲天氣.

附近有架大飛機,影埋.

久違了的渣打馬拉松

疫情關係,停咗兩屆,終於都再舉辦翻.好耐冇試過咁神心咁早起身,港鐵出奇地唔係好迫人,我記得有一年在旺角轉車等咗超過半粒鐘先上到車,人多車既班次又疏.所以我決定唔轉車,直出旺角東就算.

地面好多地方都有警察睇住,只可以側影,唔靚,舊天橋又封咗,於是一心一意走去今次想影既新位,死火,懶做功課,原來離好遠架,200mm都唔夠,好彩仲有APS模式,影出來就係咁.早知就帶支300mm來.

夜晚得一組影,天光熄咗燈個景冇乜睇頭,決定再裁盡啲睇多啲人,天色陰暗好易做到1/10秒,等效成400mm好彩有欄杆枕手,否則震到影唔到.

咁點都要影翻張啲人清楚既,天色其實好暗,日光日白都要ISO 800先有1/200秒快門,光圈都要開到F4,想再收小小增加景深都唔得喇.

利東街燈籠

呢度其實從來冇來過,近排又涷又唔好天,近近地行翻轉.

港鐵站一出幾分鐘就到,嘩,超多人,行到街尾影張全景先,為咗想啲燈籠睇落密啲,用到50mm影.

四周景點都堆滿人,唯獨呢兩個公仔冇乜人有興趣.

始終都要挑戰難度,另一對公仔係超多人既目標,係排住隊來影,我又想用50mm開大光圈影,結果就蹲低等咗頗耐,把握一班人剛影完而另一班人未到既幾秒鐘時間先影到.

兔年要影兔,呢度難度仲高,隻大兔就冇計喇,幸運地俾我影到兩隻細兔冇人.後面有桃花好靚,就係冇辦法再退後小小影細啲兩隻兔.

最後來個冇人阻到既構圖,就係魚眼向上影,幸好天仲有小小藍.

再到單車館

近排唔係好涷就係落雨,能見度低,總之不利上山影日落,夜景.只好搵啲室內嘢影影.好耐冇來單車館,要影既都影咗,之前明明觀眾席係可以自由出入,依家防疫放寛咗,反而去電梯個位貼住不準進入,OMG,咁咪要走,但我剛才明明見到觀眾席有人,唔理咁多,照推門入去,電梯有開,咁就去咗觀眾席.

真係好悶哦,全部都係得一個人既計時賽,希望晏啲會有多人賽,不過乜都影住先.

之後有追逐賽,兩架車相差半個圈同時起步,實力要差頗遠先可以追到,呢個畫面好難得,要啱啱爬頭嗰吓係面前,仲要唔好失手矇咗.

成個上午都係得呢啲賽,下午翻來都仲係,會唔會成日都係咁架,捱到四點,終於有多人賽,成堆車過彎真係好正.

大家都好想影個彎位,終於有wide鏡黨,俾佢遮住不特止,佢成支鏡隊出欄杆,陳間有人投訴就大家都冇得影,問佢介唔介意企高一級仲話翻我做乜唔企落去.冇計走去對面仲有一個位可以影.差唔多出晒彎位就可以影到長長車龍.

唉,wide鏡黨度度都有,都唔叫得咁多,剛才嗰邊好似冇人,又行翻過去,嗰個人走咗,可能都唔想咁乞人憎.今次再影前啲.其實難度係高過之前影彎位.車太近速度好快,未及反應都已經走咗,影Pan鏡要焦距稍長先易影,所以用wide鏡霸前面係搵自己笨.多數係影到乜都矇晒.

今次多咗個嘗試係影對面既車,我用另一部機裝200mm再加1.4x增距掛肩頭,到入彎即刻換掛頸既85mm影彎位.確保唔會嘥,因為多人賽只有幾場.車會細架啲但啲座位矇得來幾有效果.

再前啲就要靠圈內既工作人員做效果喇,好小可以咁角度影到咁多車.