西九煙花

西九聖誕期間有一共八日有煙花放,唔駛迫埋一日,睇怕唔會太多人呱?頭四日都唔得閒,揀咗23號去.觀景台視野比較好,但原來要人潮管制,要上面有人走下面先放人上,咁陣間去完洗手間再入來有機會趕唔切,都係下面影就算.

香港放煙花又光又密,就算有風都會搞到好多煙,可以影到既其實唔係咁多花款,呢隻算冇乜煙同花式都幾得意.

呢隻火力弱啲同彎彎地都特別.

最後來個大爆發,亂過亂世佳人,都好,範圍較大唔駛張張都勁裁.

有一件事好遺憾,一開始時掛住睇曝光啱唔啱,錯過咗HK字樣的煙花,見有時間,26號再來多次,今次有準備早啲唔飲水,臨日落前去一次洗手間就死守觀景台.個煙花好神出鬼沒,已經目不轉睛留意住,但影出來既HK係黐住好多雜火,正在疑惑之際天空突然爆出HK字樣但極短時間就消失,一啲地面射上去既預測都冇.手忙腳亂下只影到幾乎全黑的畫面,經暴力推光5級先有呢張相.

觀景台除咗角度高,仲可以影到樓下既人做小小前景點綴卟,整翻張裁側側小小既.走人其實都好大鑊,係要人潮管制咁一忽忽走的,用咗半個鐘先出到門口.