影攬仔

即係少年攬球.係講緊十零歲甚至十歲都未夠既比賽,一聽就知唔慌精采.又係論論盡盡成日出錯既畫面,不過影攬仔有一個不成文傳統,唔係影成個人撞到飛起,而係當跑步咁影,仲一定係搖拍,認為慢快門先係算影運動.

獨沽一味事實上好難影,因為一定要等到冇人阻單刀直跑先有得影,有機會時難度倒不太高,影跑步咁就得喇,好彩場細,機會比較多,方向唔係好夠橫,效果唔夠明顯.

這時好容易就走火入魔,進一步調低快門,終於就搞到全部矇晒,印象中我未見過有人影攬仔唔係全部矇晒既,但我唔會咁搏法,寧可效果冇咁出.

影咗兩場,居然打完,合拚兩個場打大啲,機會再減半,走去第二個場都係咁,有心影應該一早來,經過漫長既等候再執多張.後面全部係觀眾,花到嘔.

影埋呢張只係中午都決定收工喇,機會小得可憐,去翻地鐡站附近食餐好既.呢度淨係得Pizza而且好貴.

又是便捷的景點

除咗沙田城門河,觀塘碼頭都係好方便,地鐡站行冇遠就到.之前未懂得提早開燈大法,影既相受制於開燈時間.全部個天都黑媽媽,呢日搵時間搞搞佢.

一心諗住行去較遠有兩座呢啲怪獸嗰邊,點知.......係攔住咗做工程.得翻一近碼頭一座,仲要好多樹遮住,侷住用到最wide近影.日落又是沒趣的清水疍.上次除咗天唔夠藍之外,仲影唔到紅錄藍鮮明既顏色.原因係夜景用咗慢快門,紅錄藍三色混埋變咗白色.今次開大光圈,加高ISO只專心捕捉紅色,多次測試後快門1.3秒先有把握,仲要唔係見到紅色先影,係紅色之前一隻色就要影,快門打開時間就會啱啱好,否則就變咗綠色.最後後面既大厦係好暗既,要影多張疊上去.

觀景山影飛機

上次去完沙螺灣影飛機唔係好理想,一係太細架,一係影屁屁.諗住帶支長鏡再去影過,不過又無意中發現觀景山可能仲好,位置較前可以唔駛影後仲可以影到起飛.而且距離較近唔駛裁咁多.

距離算唔錯,不過好多雜草,實際可以影既位得幾個.先來張正正常常既高速快門,同地景都夾得幾豐富,起飛機頭向上感覺係比降落好.

跟住就係主菜搖拍.有兩條跑道,一條比較遠,就算用盡500mm都係比較細架,要裁頗多,而且用到500mm係超震.我今次帶咗腳架來,因起飛係向上,變咗要斜Pan.觀察咗幾次之後我將腳架個轉向頭Set翻差唔多斜角度,再鎖死波頭,諗住一搖就啱啱好,結果係唔多夾到,最後都係鬆咗個波頭純粹用轉盤輔助先搞掂.

好彩近嗰條跑道係比較近同埋大機多數飛呢條.500mm已經爆框咁滯,另一個問題又來,咁好陽光好難慢到快門.用到F16都仲有成1/80秒快門,架飛機又白色,後期好難救,最後夾硬用到F18再影爆小小先去到1/50秒.

用翻短小小冇咁難影,其實如果構圖上架飛機完全上晒天唔黐到地景,係可以P到地景拉得好勁但架機又好Sharp的,可能仲靚過真影,不過咁就冇意思啦,所以我張張都黐晒地景,貨真價實.

沙灘飛盤攝影

好耐冇影過運動.個會散咗之後已經冇活動,近排好多公開活動又因為示威取消晒.呢個活動都係朋友話我知.可能愉景灣咁僻搞唔到呱?

飛盤之前體育節影過,話難又得,話易其實又好易.要影到飛盤在空中冇乜難度,由於飛盤係滑翔關係,飛得唔係咁快,看準運動員一起手掟就影九成都影到.但就太普通,冇乜競賽感覺.

要打破呢關係要影接飛盤.成個表情同動作都唔同,不過要估邊個會接,難度會高好多.

由於要追去接,有時仲會成個人剷沙.

又或者成個人跳起,咪走呀,我的寶貝飛盤.

當然爭奪畫面更加係重中之重,想同我爭,食沙啦.呢啲畫面唔係沙灘比賽係唔會有.

成個飛起都有.可惜唔係好影到正面.講開食沙,其實我應該都吸唔小.我有試過搵支135埋去影,實在頂唔順,就算依家用300都好大沙塵.長期玩應該個肺會有事.

飛起又影到正面,可惜旁邊嗰個冇咗一忽腳,諗咗好耐究竟出唔出相好,後一張係個已經插咗沙但有埋腳,最後都係鐘意呢張多啲.

藝動沙螺灣

無意中睇到個活動,諗住又係搭兩點船啦,點知……冇咗喇,原來9月28日已經取消咗.侷住搭3點25分船,浪費咗人生既個半鐘.上碼頭時竟然碰到一齊摸門釘既三個人,佢地已經睇完走人,原來可以租船的,又長知識.

好在只係十幾分鐘船,沙螺灣村也不遠,行十分鐘就到,第一件藝術品就係呢個叫千里眼的東西,全部係用樹騰人手織成的,不過我同意網上形容,似進擊的巨人多啲,我特登影埋一對父女,可以睇到佢有幾大.

旁邊有另一件藝術品,據說係模仿水滴,上面既膠管有水流動的,呀…藝術既嘢真係都幾抽象.

行翻另一個方向就有第三件作品唔記得是甚麼龍.幾普通但我見佢夜晚着咗燈都幾靚的,現場環境絕對唔係咁,作品旁邊係超多雜物的,我又唔想影直度,事後搞咗一大輪.

其他細件藝術品或者小學雞活動我就冇興趣喇,而且其實4點半就完,我另一目的就係去觀景台Pan飛機.原來都幾遠,我得支135mm加埋1.4增距,實得189mm.再裁到APS-C多啲先有咁大.但實際最大問題係架飛機好慢,1/30秒都冇乜效果,再慢又實在太震搞唔掂.

再影埋起飛,架飛機近啲大架啲,同埋地面雜物多比較有效果,可惜角度係對住飛機屁屁,只係影來玩吓.

最後就係碼頭影埋個日落先走人.尾班船係6點22分,要搏大橋開燈就要坐尾班,5點半嗰班就快到碼頭,算啦,個位都唔係乜靚位,早啲走翻屋企食飯.

制造假像

影日落相一向都認為要將白平衡設定得比較暖調,做成日落金黃色的感覺.不過慢慢就會覺得成張相偏晒色一睇就知係假嘢,尤其有啲人比較重手,變得好超現實.

好似呢張相咁,我已經盡量將前景調翻冇咁紅,但係個天一睇就知好重味精.再淡啲又好似冇乜日落感覺,平時個個慣咗重味,去翻人眼感覺反而唔自然.不過有一種情況係例外,就係用到好廣角焦距,影到大片天空,咁離太陽較遠既天空因太陽光影響唔到會變翻藍色,咁就最正喇.

但唔係個個景都適合超wide納入大片天空,一用長小小焦距就成個天橙晒,有日靈機一觸,試吓人工整個藍天俾佢,用原相調低K數,出到想要既藍天.可以睇得出近太陽既天空都係橙色的.

之後就係疊埋兩張相再用漸變露出想要既藍天啦.最後結果就係咁喇.

大東山尋芒草

大東山的芒草很有名,一直都冇去只因聽聞好多梯級,要上得好辛苦.

終於下定決心上一轉,朝早明明係好好天,去到山腳就陰天,差唔多到頂仲變埋大霧,一場來到,就算冇嘢影都攻吓頂,柳暗花明,再上啲霧散咗,就咁路上已有芒草,影翻張逆光先.

一直行冇留意到原來上山頂要左轉,給果誤打誤撞去咗二東山,見到爛頭營,坦白講有啲腳震,順光影麻麻地,見到太陽已經俾山遮咗一半,仲要極速走過去爭取最後一道逆光.

一走過陰影就火速set腳架,個山咁高,但其實成個山頭都係人.原來依家啲人都幾好體能,芒草事實上係未夠時間的,仲未出現絮化,只係一支支咁.

見仲有時間,決定走入芒草堆影張冇人既,地上是有路的,但似乎是芒草生得太密遮到冇晒路,要撥草尋路,費好大氣力先搵到舊石影到張冇人既.

終於玩到冇光,係時候回程,上到來手機訊號好弱,一直同朋友失去聯絡,原來佢識得左轉上山頂,咁同佢在上山頂左轉位置會合啦,點知原來仲見到日落,清水疍冇乜睇頭,芒草也因為冇逆光變得好淤色,只係好過冇.

錦田河攝影

見到人地影錦田河影到窿窿加日落幾靚,於是又想去翻印一份.不過又係好似華富村雞疍仔咁衰,一定要水退先影到,仲要低過一米.睇翻天文台,今年又放假又啱水退條件既得翻一日,但個天又唔係好爭氣,日日都陽光普照偏偏呢日就係陰陰天,唔理喇,當探吓路啦.

拍攝地點在南生圍污水泵房,坐的士最妥當,到咗再行入小小就係,唔係好對路,點解咁多草阻住既,我見人地唔係咁嗰喎,睇真啲原來要爬出欄杆到下面亂草堆.哎呀,原來草下是淤泥,腳架既腳好易陷咗入去,唔係好穏陣.呢個構圖應該得一個腳架位,最多兩個.咁既天氣都係得個搞字,唯一好處就係一張過唔夾相都得.走都幾大鑊,冇的士要硬行,好彩行半個鐘就出到大路有車走.

珠海攝影

每次工作經過珠海見到大劇院都好想影佢,所以去完澳門就決定去一日.

山長水遠冇咁嘥淨係去影大劇院呱?預咗用觀光巴士L11去幾個景點,第一個係景山公園,坐吊車上山影大景.點知…….又出閘脫腳.公園關閉,冇計,行一個車站去影珠海漁女,呢個時候差唔多中午,頂光麻麻地,我特登影埋下面啲人熱鬧啲.

原本想就咁行一個站去海濱影燈塔,但咁熱最後都係搭巴士,幾遠都係一蚊.好曬但個天又唔藍,真唔抵.

個燈塔仲可以在愛情郵局餐廳樓上影,角度好啲,齋影唔多好意思,叫杯珍珠奶茶順便休息吓,餐廳內有兩個大心,樓下仲有個郵箱可以扮寄情信,啱晒鐘意打卡既人.仲擺咗支腳架俾你地夾電話自拍,唔駛驚唔夠手長.

終於要搭車去大劇院站,途中會經過得月舫,係類似珍寶海鮮舫咁既酒樓,有諗過影佢同大劇院一齊,但唔係好就到,就咁影吓佢,未開燈認真麻麻.

搵來搵去都冇乜好位影大劇院,日落又唔啱方向,終於搵到個位影日落,天氣又係…

好喇上主菜,奇怪,做乜啲燈開得咁古怪,個細貝超光,大貝冇光咁滯,連終點都脫腳,算啦早啲收工. 

點知行到出的士站個大貝忽然轉咗紫色燈,雖然都係麻麻地,唔影埋又有啲可惜,估唔到仲有激光添.

超短花期

星期四在網上見到盛屋村有鳳眼藍花海,星期六天氣預告又好天,一於去打吓卡.

未去己經有人講花期好短,我估兩日唔會差好遠呱?網上又有人話星期五去都已經謝咗好多,只好睇緣份啦,終於………果然見到中間有啲已經枯咗,我估係呱?我唔係好識.不過都算係咁啦,叫做有啲一點點紫色. 算做都有相.

之後就係日落,呢個方向更加小花,而且位唔多,試過走去一個連放腳架都冇既位,花仲小,走翻轉頭已經冇晒前面位喇,有小小草遮都算喇,求其紀綠吓啦,估唔到兩日已經咁大變化,唔怪得好多影到啱時刻既風景相都係出自已退休人仕.