城門河賽艇

賽艇其實幾悶吓,同龍舟差唔多,都係影多船畫面同場比拚.可惜賽艇設計太好,唔駛好似龍舟咁爬到面容扭曲,影出來唔夠刺激,不過今次我想練習慢快門.

由於200-500只可用在舊機,用唔到畫面邊緣既對焦點,侷住重啲都要帶300mm再加1.4x增距.賽事分2000m及1000m,起點係唔同的.冇錯在1000m起點係可以影埋2000m賽事經過既艇,不過要同時影到好多船都係唔好離起點太遠,好易散晒.所以2000m比賽時我就去2000m起點影,終於等到最多人既八人組.

中間有幾場1000m比賽,唔影好似好嘥,於是就行1000m去起點,每場起步間隔10分鐘,真係趕到滿頭大汗,哎呀,竟然係最悶既單人賽.

都係放棄最尾嗰場1000m去翻2000m起點.否則真係會虛脫.由於用到420mm焦距,慢快門係好高失敗率,我只帶咗單腳架,可能三腳架會好啲.雖然慢到1/80秒,都係冇乜搖鏡效果.因為艇既移動實在係太慢,唯一係可以表現到槳既動態.

下午要遷就光線方向要過橋對面,冇咗有頂既座位,曬到變人乾,唯有每場一影完即行100m去翻樹陰.仲有個問題係大會用咗近岸呢邊做下一場等候位,賽事主要用遠處幾條線,焦距都唔係好夠長.如果唔多過三隊的話可直接放棄,慢快門仲可以做出大水花效果.

藍衫呢隊明顯比其他隊伍快,可以做到有小小搖鏡既感覺,水花也較大.

好多人話背光先有藝術效果,但係我好憎啲水爆晒變晒白色.超好彩,決賽幾乎係滿座,用到最近第二條線,影到個人夠晒大.

香港天燈節

在FB見到有呢個活動,其實都知應該流流地,見落晒雨冇地方去就去吓.

大會有個目標係摺紙鶴數量破世界紀錄,我覺得其實幾無謂,呢啲所謂紀錄,只要搵啲冇人做過既嘢去做就得,之後就係大量垃圾.而最重要係跟本唔靚.

除咗樽裝仲有掛裝,包晒膠紙,真係嘥好多功夫,不過離遠睇係就好似窗簾咁囉.

舞台耐唔耐有唱歌表演,不過我冇乜心機睇,一心只想卡個中間位影假天燈.好彩冇乜人用腳架,襯有人行開咗我立即就佔咗個中間位.落雨做成有個水氹,大家都諗住影倒影,我發覺係唔得既,因為水氹裏面好多人做草,不過咁都好,大家要避開水氹唔可以鬥前,變咗可以用長小小焦距影,燈既大細可以比較一致.影完天燈就走人喇.舞台冇乜興趣,早啲翻屋企.

紅鋸情意結

睇翻以前影既紅鋸,清楚係清楚,但全部都歪歪斜斜,硬係唔得四正,雖然龍鼓灘都頗遠,都要去搞一搞佢.

四周都係紅鋸,但肯停個好位既就真係冇,又係歪歪斜斜,搞咗一大輪都係得個桔,不過其他人似乎係珍灰情意結,好快就搵到來影.我自然又拖衫尾唔好執輸.

好喇,終於有紅鋸開翼平放,唔紅既,原來雌性係咁,不過個位都真係好亂.唔合格.

有隻角翅弄蝶,我影咗嗰啲又係歪歪斜斜,今次要認真影靚佢,又係好似紅鋸咁不停郁,而且佢背部彎彎地有啲馳背,唔夾相好難夠景深,但佢不停郁始終唔夠時間,最後翼尖都係清唔到.

突然起哄,原來有罕有蝶,聽佢地講應該係遷粉蝶,血斑型.太瘋狂我唔係好敢去前排影,咁啱停在橋的鐡絲網上,旁邊師兄用300mm正面太近對唔到焦,我就唔客氣喇,有冇覺得個背景有啲怪?其實我大執先整走晒啲鐡線網,功夫所限........

八仙嶺攝影

八仙嶺給我最深印象就係有老師同學生遇過難,我估應該都好難行,所以一路都冇留意實際路線,最近睇You Tube有人介紹.原來路線都好明顯,唔係好險要嗰種,咁諗真啲都係既,帶學生行山冇理由揀啲咁危險既.

初段路都好平緩,不過......好長,行極都行唔完,行咗45分鐘,終於到咗........登山口,一睇路牌,仲有一公里,需要半小時.,而且幾乎全部係樓梯.之後仲要由仙菇峰過去湘子峰,千辛萬苦終上到來.180度都有景,就分開三張影啦,先影船灣淡水湖條堤壩.

之後嗰六個峰就咪搞,睇地圖有條捷徑上純陽峰,唔知險成點,中間位原本諗住最靚.不過影出來又好似冇乜特別.

之後影埋右手面,原本上到頂又係大風到死,諗住又要大光圈,高ISO硬拚,好彩後來搵到個凹入去既位擋咗啲風.呢個位可以見到慈山寺個觀音,如果太陽過小小就好啦,依家只影到小小紅天.

拍攝迪士尼

迪士尼冇耐前重新有翻放煙花.除咗以前去過既花瓶頂,我仲上網留意到竹篙灣咀可以更近距離影,唔駛行咁遠之餘,可以用短啲焦距,又冇咁驚天色唔夠清.

山不高只有117米,我見人由迪士尼站出發,35分鐘就到頂.路程雖唔長,但可能小人行,好多草伸出咗路中心,又有塌樹,有幾處要烏到好低先過到.上到頂一個方向影到迪士尼,另一個方向可以影到竹篙灣既隔離設施,襯天未黑影咗佢先.

跟手要即刻影埋迪士尼個底景,雖然煙花八點半先開始,但到時個天黑晒唔好睇,而且城堡附近會熄燈,畫面會好單調.我帶咗24-70mm同埋135mm來,但最後用咗70mm影,上次去花瓶頂有啲好高既煙花,由於要配合底景冇得改構圖,啲煙花出晒界都冇計.今次影wide啲留翻來裁.最後確定咗好高既煙花係冇咗,早知用135mm影,不過咁有咁好,可以裁唔同大細,先來張比較多景既.

個城堡好似太細,裁多啲,影完用咗大約半個鐘落山,諗住迪士尼啲人走得七七八八,實際係超級多人,搞到車站要人潮管制.捱到出欣澳又要迫多次上東鐡,認真攞命.

鶴藪影蟲

見人地在鶴藪影到中華雲灰蝶我又去試吓.我唔識搵甚麽秘位,只係坐小巴去到總站就落車.

天氣時晴時雨,剛好總站旁有個亭可以避雨,唔駛一落雨就好狼狽,咁既天氣都唔駛旨意有蝴蝶,停雨之後我搵到佢,原本黑媽媽好樣衰,不過有啲水珠都幾得意,如果係蝴蝶就正喇.

襯未落雨又再影吓怪獸,隻眼一點點幾得意.而且上下都有樹葉構圖都幾好.

原來小巴總站是在村內的,在亭的位置轉個彎幾步就到,不過村係唔俾入的,變咗擺幾張凳在村出面等車.唔敢行咁遠,就在呢個位附近影吓.呢隻小蟲黑媽媽不過眼睛啲紋幾得意.哈,影佢嗰陣佢啱啱伸腳抓背脊.

成日見得最多就係呢種蟲,反正冇嘢影,花時間慢慢影清佢.最難搞係佢唔多平面,終於用到六張夾先夠景深.落雨天都係運桔多,好彩小巴又幾密,係時候收工.

出海影燕鷗

上年都想參加,不過一路落住雨搞到去唔成,今年報名先知道要平日,同埋朝早六點半就要彩虹站集合先可以避開人潮,領隊話為咗就大家搭頭班港鐡先咁晏,否則會再早一個鐘.彩虹站仲要再搭多半個鐘的士入黃石碼頭.之後先駁大飛出海,真係山長水遠......

船程大約15分鐘.唔怕暈船浪,不過原來好拋,只要有小小浪就會成架船淩空再撻落水,撞到Pet Pet好痛.終於捱到小島,嘩,好多燕鷗而且好近.船主亞姐即刻開工,就係拋買來既魚仔落海引燕鷗爆水捉魚.一拋就成堆燕鷗衝落水,我諗住用300mm影,結果好似太長搞唔掂,好彩有帶埋135mm去,寧願影wide啲睇吓揀唔揀到啲裁.都叫做有水花有捉到魚.

其實都冇乜技術,總之對住堆燕鷗狂影碰碰運氣,別以為日光日白用支細光圈鏡都得,燕鷗動作非常快,就算F2.8都要ISO 400先谷到上1/2000秒快門.而其實都未夠快,有啲快速横飛既都矇咗.

飛緊有魚既都影吓.有啲唔對路,亞姐似乎太勤力,大殼大殼咁抛,轉眼間四包魚已經冇咗兩包半,咁搞法好快可以收工,而且拋咁快其實影唔切,一個位都未影完又到第二個位,記憶卡都寫唔切,於是領隊同佢講一次唔駛掉咁多魚,三條或者其實一條都夠,而且掉完一次可以停一停先再掉.

之前影咗咁多應該點都有啲呱?所以休息一會以後,我又換翻300mm影,希望唔駛裁咁多,300mm控制果然唔容易,唔單只對焦成日甩,一唔小心又出界冇咗翼尖.

其實300mm個焦距係合適的.專心一意影一隻係OK的,只係太多燕鷗同時衝落水搞到亂晒籠,呢張只係輕微裁小小就搞掂.

終於影到張有魚既畫面,方向唔啱景深太淺添,對翼都矇咗.第二朝瞓醒,Pet Pet開始痛,痛咗兩日.

越野單車賽

同一日有兩個單車比賽,繞圈賽在公園舉行,肯定冇人阻我影相,但係上網睇睇地形,沿路好多樹木,而且貼在路邊拍距離太近,唔容易用搖鏡手法.越野賽在小輪車場舉行,最低限度可以喺觀眾席影,一於扮家長混入去......

果然好易就入到去,仲有洗手間,飲品售賣機同冷氣等候室,夠鐘先去觀眾席,仲有上蓋遮太陽,真係正.賽事開始.仲未試清楚設定已經走咗好多車.好彩都影到兩架車交錯既畫面.

今次唔係小輪車,即係BMX比賽,賽道唔經最精彩嗰兩個大碗形位,得翻中間波浪形跑道影,而其實好多位係阻住就好似咁,唔理咁多都照影.

觀眾席背後可以睇到越野部份.上斜部份車太慢,冇乜好影,啱啱有個向下斜位可以衝落來,係拍攝好機會.不過焦距要比較長,容易手震.

相信你都睇到現場好多膠紙做成既賽道,地面既情況就變成膠紙陣,基本上全部單車都被切開.

再加埋鐡欄同樹林,真係亂過亂世佳人.

中環街市微縮展

微縮展成日炒冷飯,好多都係展完又展,不過見廣告有啲新展品,可以專影呢幾件.

諗住平日去會冇乜人,結果係錯既,原來好多香港人係唔駛翻工架.維港全景梗係要影啦.不過長條形影晒既話會穿崩,我選擇只影一忽.係唯一一個冇玻璃擋住既景,有一點要留意,如果好似我咁諗住疊相,影前景既時候記得等屏幕冇嘢播緊,到最後一張先影有煙花既,否則會花到唔用得.

呢個景好經典,同以前攝影大師既構思差唔多,好多人去抄,模型只係貪得意,我平時應該都唔會影.

街市內部景,一唔小心影到後面個進擊的巨人添.

個戲棚其實好大好靚的,不過全部一支支竹唔識影,只好影個台啦.

輕鐵新景,又有進擊的巨人,裁無可裁,再裁架輕鐵會冇咗一忽.我其實同朋友夾咗話幫手搵件衫做背景遮遮的,不過佢話咁多人搞啲咁既嘢驚俾人炳.

爬龍舟個個都係影前面嗰隻,矇咗個背景,我都有影不過我想影埋個全景.水平角度係夾唔到的,一定會有光暈圍住啲sharp位,其實依家都有,不過比較冇咁覺眼.點解咁似用電話影既?都係由得後面班觀眾矇咗佢感覺靚仔啲.

呢個場景無論如何都想清晒表達吓係好多人.咁亂有小小光暈都唔係好覺既.

社山攝影

好難得有小小陽光,唔想搞咁夜要搵個近既地方,最近就係社山.

一路都冇來只因知道個景係麻麻,山高只有百幾米,半粒鐘左右就登頂,不過下面馬路都幾斜.拍攝的位置不多,要zoom到35mm先可以避開旁邊的雜樹.臨到日落又來低雲搞彎咗,好在都有啲紅霞,來個三分天下,天地屋各一份,等埋開燈就搞掂.