又影櫻花

上次去荔枝角公園影既櫻花麻麻,原來近我既大埔海濱公園仲靚,早知唔駛去咁遠.

入口冇遠己經有一排,不過係麻麻地,唔似網上見到嗰啲.入到回歸塔離遠已經望到最靚嗰堆,行過去就得.就咁影翻張背景乾淨小小既.

試吓背光影,充滿光線的感覺,但始終係好亂.

齋影花好悶,尤其呢排已經洗晒版,咁啱有人擺公仔,乘機抽水影翻啲.人地擺埋你影唔好意思咁多意見,雖然我喜歡淺色背景,但公仔白色頭髮其實深色背景會好啲.

另一個就好啲,頭髮冇黐底.不過呢個公仔有條鐡連住,以我道行,事後要執走佢都幾費力,另外要影全身都困難,仲要執走埋個底座,所以都係影半身算喇.

流浮山影日落

去下白泥時經過流浮山,據說也是影日落好地方,而且最近好似裝修過,最重要係唔驚冇車走.

首先要去搵大黃蜂,地方比想像中細,除咗大黃蜂,仲有個中秋節嗰陣喺小白鷺既月球,叮噹車仔,得支24-70mm,用盡70mm影,原來好多位可以後啲影的,早知帶支135mm來影.

影日落既話,大黃蜂個位認真麻麻,前景只有一片乜都冇既大海,可能潮退會好啲呱?不過我選擇去高啲既流浮山舊警署影.門口係封咗既,要去側邊鐡線網爛咗既地方潛入.見到警方封條不準前進就代表搵啱路.上到天台就可以獲得較好的視野.成擔心機來到,日落又係矇查查.

順手影埋個夜景,走既時候真係有啲入咗鬼屋既感覺,一屋爛嘢又黑媽媽.如果突然有個人走入來真係嚇死 :P

市區櫻花

早排香港處處櫻花盛開,於是就是但去比較近既荔枝角公園影吓.

知都知只係得幾棵,但原來花朵都頗疏落,背景又靚既都冇乜,求其影咗幾張近照就算.

來得呢度其實多數目的都唔係影花,一係雀加花,一係蝶加花,影雀似乎冇乜行,上面成排腳架加長炮停晒手,直情人都行開埋,得翻部機曬太陽,蝶係好多,不過只係得全年都有既報喜,由於係低炒,事實上要搵一隻啱焦平係一啲都唔易,十分考耐性.要背景乾淨就更加難,我冇乜耐性,所以只可以咁.

三聖村漁船

網上睇到過年期間,三聖村前面避風塘會堆滿休業漁船.不過嗰度冇乜自然高位影到,啱晒啦,好耐冇出動過航拍機,可以去用用.

一開機又話要更新,明明早一晚已經檢查咗,今次又話要更新禁飛區.無端端嘥咗啲電,終於起飛,飛到90米又出警告,風力太大,請盡快搵地方降落,唔係呱?咁遠來到,等一等冇咗警告,不過唔敢飛咁遠,求其近近地影咗就算.啲漁船一排排都幾得意.

飛得上去自然影多個唔同角度,航拍取景角度實在太好用,上山都冇辦法用咁角度影黃金海岸,遲吓冇得玩都真係有點可惜.

青龍公園

呢度水路係遠啲,但唔駛上山,啱輕鬆影吓.上次去鋼線灣都見到有兩個同道中人,唔計用手機,今次影相既真係得我一個.

雖然係春天,不過青苔就未有,前景只能係一堆大石.最近開始用連拍包圍曝光影日落.之前我喜歡自己續張慢慢調啱心水先影.冇錯係準啲,但缺點就係慢,尤其當畫面有移動物體,合成時既鬼影會比較嚴重,連拍都係會有,但問題較輕微,有時可以側側肩唔理佢.這裏日落沒有山遮住,真正是水平線日落,光差也較細,清水疍都冇乜好等,影咗三張就收工.

影西隧

上次去西九影聖誕樹經過呢度,覺得個景都唔錯,交通非常方便,一出九龍站E出口,行幾步上天橋就係.

同一般影風景唔同,個景係好闊,但反而唔可以用太wide.因為佢好似紅隧咁,前面有個屋簷.用wide鏡會影到佢,最後要zoom盡70mm先避到.呢個景比起紅隧都係差啲,可惜紅隧已經封咗鐡線網冇得影喇.

慢快門影武術

有室內武術影,唔係大賽,估計地方都好窄.果然真係窄到路都幾乎冇得行,好彩大會係冇乜限制我地拍攝位置,自己搞掂就得,最大問題係幾乎所有位背景都花到不堪,大光圈都幫唔到.

幾經努力先搵到個勉強可接受的位置坐低,武術之前已經影過好多次.今次冇乜高難度跳躍翻騰動作,啱晒要來試慢快門.唔知幾時開始,好多人既運動攝影就係等於慢快門,不過多數都係走火入魔,慢到乜都矇晒.我係保守派,運動員樣貌一定要清楚先收貨,所以效果也冇咁誇張,我見有人支棍可以轉到成個圈咁.

好小見既塵拂,對面嗰位攝影師咁既角度其實背景會係觀眾席,勁花,不過我都諗過坐嗰度,因為表演者面向評判,坐到我咁側好多時會影背脊,正面只有勁小機會,多數係影側面,但背景係觀眾席實在頂唔順,只好換位.

雙刀唔見咗一把,冇計,得呢張塊面清楚.慢快門之所以難得就係失敗率好高.所以有人會將標準降低,全部矇晒叫做有藝術感.開心便是.

都係棍有動感啲,其實仲有好多項目,不過慢快門成功率太低,要交相闗係,都要影翻啲快快門既相充吓數量先得架.

日落鋼線灣

呢排日日都係天陰陰,突然間有太陽,嗱嗱聲去影日落.夜晚冇堂食唔適宜搞咁晏,上山影埋夜景既話落得山來最快都七點幾,翻得屋企來分分鐘九點鐘先食到飯,要搵到影完日落就可以即走既地方.

鋼線灣其實我之前來過,不過嗰次搵唔到個燈塔,因為行行吓唔對路掉頭走咗,原來堅持行多一陣就到.拍攝過程好順利,呢個位肯定冇夜景影,一影完日落即刻急步去搭小巴走人.千算萬算,小巴架架都係滿座,等咗半個鐘先上到車.仲要堅尼地城搭一個鐘港鐡,結果都要八點半先食到飯.

影吊鐘花

呢排好多人都去影花,吊鐘花好似好有人氣,啲行山片條條都係講去睇吊鐘花.又去襯吓熱鬧.之前都影過吊鐘花,係好難影得靚,花本身都幾多葉,成堆影唔夠純色壯觀.就算特寫,如果唔向天影,都好難搵到個唔雜既背景.

仲有方法就係影得大啲,景深自然淺,但咁就連主體景深都唔夠,又係時候做景深堆疊,影花最大難度係驚有風,好彩影嗰度冇乜風,不過就好多人,而且個個唔戴口罩又多嘢講,路又好窄,有時成堆人哄埋來我都避避先再影.就算只係影一束花我都覺得有啲亂.

之後其實就棵棵都係差唔多.影埋個抵抄就收得工.

影得幾分鐘

今次影既劇目係大鬧廣昌隆,未影之前都覺得有啲奇怪.呢個劇目應該冇乜打戲,不過姑且一試.今次係去未去過既葵青劇院.睇平面圖仲大過高山劇場,咁支300mm分分鐘都唔夠長.....

去到係錯晒,原來平面圖將兩邊座位拉咗出來顯示,實際係同樓座重疊的.咁就問題喇.300mm幾乎爆框.135mm又好似短咗小小,唔理咁多,照影,分上下兩場,但上場全是文戲,個個停晒手.下半場鐘馗出場先冇咁悶,樓座角度始終有啲怪.

鬼仔一齊出場,這時只好用135mm影再裁,其實都OK.

跟住又來奪命狂講,終於去到眾鬼對付大奸角先開始有動作戲.雙鬼擒拿手你走唔甩喇.

衫都甩埋,有幾個跟斗影吓.

全鬼出動走唔甩喇,大會嗰支白色射燈真係玩死,又光又同背景唔同色,事後執餐死,精彩既畫面真係得幾分鐘,早知臨完場先來就得啦.新年流流講鬼好似唔多好,祝大家百無禁忌 :P