一橋三食

襯住小有既有太陽日子,去完成埋影青馬橋迴旋處既目標.上次應該係太早轉右導致冇路落低位,今次唔理三七廿一去到最底先轉右.去到入口突然烏雲密佈,竟然落出雨,唔係呱?唔通要徹退,見個天一邊都幾光,等咗陣真係停雨,天雨路滑都照行啦.

 

原來一路落真係可以落到底,去到馬路路面,而且冇欄杆,可以行到出去,途中好多蜘蛛網,我破壞咗唔小人地屋企,跟住轉右原來仲有好遠水路,最後大約上翻三層左右就到適合高度,當中都有小起伏要上上落落,行行吓竟然又落雨,唔理喇,去到呢度幾大都捱埋,祈禱點都俾埋個日落我先好再落雨.唔算好靚叫做有,不過24mm原來唔夠wide影晒兩個橋墩,翻去睇咗一陣覺得唔三唔四仲裁咗小小,早知就索性影多啲個迴旋處.地面佔既部份比較大,雖然開咗燈(七點十分先日落,七點已開燈)但唔夠太陽光,冇乜睇頭.

 

 

咁就等夜景啦,唔駛等開燈喇,只要等個天夠藍,日落方向的話,個天係黑得比較慢的,成天都係雲,真係麻麻地,可以睇到冇雲既地方都仲係好光.但已經係七點四十分.

 

 

最後一食係要合拚日落同夜景,必須再要等到個天黑過日落先得,終完影成走得已經係八點,但最艱苦既部份現在先開始,要好遠水路行翻去最左手邊既樓梯,然後由山腳行翻上山上入口,通常走人係落山舒服好多架嘛,依家變咗上山辛苦到嘔,行極都仲係樓梯,啲蜘蛛好有效率,又成條樓梯都係蜘蛛網,最後用咗整整一個鐘先去到入口,連牛仔褲都濕晒,水自然係飲晒,好在之後係落山,否則真係脫水,餓到死,好在葵芳有麥記,唔該大可樂加巨無霸加粟米杯……冇喇,我地十點收工,仲有十分鐘,咁你有乜就俾乜我啦,食完都仲係好空虛,再去Seven補多支水加麵包先掂.

澳門一日零夜

港珠澳大橋影過,但就未去過,咁啱我細佬又翻來話想去,就計劃了今次一日之旅.由於我樓下就有巴士去機場,最方便方法就係搭去青馬收費廣場再轉其中一架可以去口岸的巴士,已經係星期六,過關非常暢順,大約一個鐘就到澳門,唔同搭船,呢度冇酒店免費車出澳門市區,只可以搭101X或者102X,車費六蚊.第一站原本諗住去港式飲茶,點知間酒樓啱啱執咗,終於去咗新萄京對面間麵店食崩沙腩同牛雜,幾唔錯但頗貴.

接下來就去永利皇宮搭免費吊車,亞馬喇前地即新萄京附近就有巴士直達,又係六蚊,終於都有吊車平過松山纜車喇,仲有每半個鐘一次既音樂噴泉,大約兩分鐘前去排隊就可以在高空欣賞喇,不過影相就麻麻,吊車玻璃超反光而且又厚,影出來好矇.

天氣咁熱,去室內睇吓藝術展順便嘆吓冷氣,有幾個展品都幾求其,只係用大屏幕播啲迷幻畫面就算,有啲用花砌既,呢個叫做比較特別,有啲半透明效果.

跟住都係室內啦,天氣咁熱戶外唔好搞喇.永利皇宮搭巴士去永利又係六蚊,呢度有兩場表演,又係每半個鐘一次,好多人但係都迫到去前面,首先出場既富貴樹,成個表演都好無厘頭,開頭係天花開個窿播吓畫面,然後有盞大燈降落來,地面又爆開升棵大樹上來,四周打吓燈咁.最後好似有啲銀仔掉落來.

由於半個鐘後就有富貴龍表演,所以都冇行開佔頭位,有龍始終比較型.噴晒煙加埋射燈效果幾有氣氛.

表演話咁快就睇完,去翠華食下午茶醫肚,樓下有歌舞表演順便又影吓,企唔到中間又唔想斜影結果只影到兩個人.

原本諗住上主教山影日落加夜景,不過計一計時間7點10分先日落,影得夜景來可能要7點45分,再落山,再搭車去關口,再……可能搞到好夜,就決定豪一豪去旅遊塔算數,要成160蚊架,一影完落樓下就有車走, 搭巴士又係六蚊,好似乜線都係六蚊咁,今日有陽光,不過日落都係冇料到.

只好影夜景啦,澳門半島呢邊最靚就集中影呢邊,有時間先再影第二個景.過程中見到永利有噴火表演,下次可以去影佢.

最後影埋呢邊,日落都係呢個方向,不過冇收獲.影完嗱嗱啉去翻朝早間麵店食飯就走,到關口已經九點幾,仲要坐金巴,仲要轉機場巴士,結果翻到屋企係過咗十二點@@

328影馬騮

數年前跟同事去城門水塘影馬騮發現一個好大問題,原來多數係好暗的,嗰陣用APS-C雖然有1.5等效焦距,70-200mm剛好夠用.但ISO上到1600開始好粗,再長既200-500mm只好靠晒閃光燈.

328已經頗重,今天仲要帶埋wide鏡及可中軸橫置既重型腳架預影日落加大灟斗排洪.加埋水仲要行咁遠真係有點擔心,估唔到一到入口燒烤場已經勁多馬騮,仲一家大細,全開F2.8景深好淺,轉咗幾個角度先影到前面兩隻都sharp.

跳嗰啲影唔掂,快門太慢,影瞓低既,俾佢啤住我添.

跟住就行去水塘大灟斗嗰邊,途中補給站有機會影到馬騮上樹加綠底散景,用盡328既淺景深.最後到了大灟斗,今日多雲冇日落,只係試吓位.證實24mm係唔夠wide既,要用到16mm先影到灟斗加日落,咁下次淨係帶腳架同卡來,再帶多個有超廣角鏡既人來就得喇.行翻轉頭走既時候諗住補多幾張啦,點知所有馬騮都走晒,一隻都冇.

單車公園影蝴蝶

第二次市區影蝴蝶,上次華富村都覺得好神奇,今次的目標柑桔實際上唔多啱我,又係要影到細細隻跟住裁大不合我風格,不過環境係好靚既紅棗花又幾吸引.

 

其實學名係千日紅先真,嘩,好多蝴蝶,如果你鐘意影纖粉,應該可以影爆卡.因為幾乎全部都係佢,白色蝶其實好難影,一受光就爆晒,好彩仲可以靠後制減高光同推高陰影,對比無可避免會低小小.另一個係焦距問題,要影到好多花隻蝶又有翻咁上下大wide啲着數啲.不過會顯得比較疏落,要啲花密啲用長焦距會好啲,於是我照加1.4增距,事實上我唔加都唔夠近影到咁大隻.

 

 

冇乜其他蝶既關係,連金斑都變成焦點,佢平時應該冇人影,我就冇乜所謂,我覺得配咁多千日經都幾靚吖,夠近既關係,啲花變得好大粒,同埋數量小咗.

 

 

 慘呀,連豆 丁仔素弄都爭住影,唔緊要啦,有千日紅嘛,開始有啲雨,食埋飯就走人.

 

軍營開放日

這個想去了幾年,終於的起心肝早一個鐘去排隊攞飛,原來一個人可以攞四張,咁我就攞咗兩張新圍,兩張昂船洲.

星期六下午先去新圍,預咗呢度規模比較細,應該冇咁多人,頭班車原來要早開門一個鐘開,但幾分鐘就到門口,搞到門口又排咗接近一個鐘先入到去,超曬既關係,冇乜人去霸頭位影相,我都等到開幕前15分鐘先行埋去,佔到頗中間位置,有上蓋既地方基本上係俾前面遮晒,乜都睇唔到的,隨住樂隊一輪演奏後,國旗隊伍終於進場,咁多人頗壯觀.

昇旗禮開始,起來………旗張得唔係好夠開添.之後有樂隊大纙大鼓演奏一輪.

之後有搏擊示範,有啲似柔道,之前一直驚焦距唔夠長,實際最遠都只係用到330mm,呢一幕爆晒框,要換支135mm出來影.                                   

仲有刺刀同對打表演,由於只開三邊觀眾席,背景好乾淨,啱晒我.

最後是戰車表演,係真係會開炮見到火光的,不過我影唔到,最衰渣唔定主意係咪玩慢快門,一時冇留意就錯過咗,但開炮只係一吓,高速連拍都未必中既.跟住就冇喇,成個過程得個半鐘,其他展品只有幾部軍車同啲槍械俾公眾試玩.仲有免費嘢食派,但我梗係走啦,曝曬既關係,已經成身濕晒.

第二日又去過昂船洲,今次半個鐘前先開頭班車,心想安排得幾好,但去到就好震驚,打晒蛇餅,啲人唔知邊度來,結果搭頭班車都入唔到觀眾席,已經爆滿,更莫講話去中間靚位影相,侷住去對面昇旗位後面來個近距離影昇旗.點知………有所謂護旗隊,成排人遮住乜都影唔到,之後運動場中間既表演唔係俾個背脊我地,就係花到阿媽都唔認得,乜都影唔到,十分失望.直到有啲比較邊位既表演先有啲生機,用到420mm,影像開始有啲散,原來合作翻牆係咁的.

有火又有跳,正.

後面背景就係咁架喇,如果個士兵唔係叭低,應該就會隠咗形.                            

之後係要去補給,有免費飯同包點派,但冇可能排得到,給果十蚊雞買支甜筒頂住就算,但水不能不排,因為冇得買,帶來既一公升加埋佢送嗰支水都已經一滴不剩,排到埋去裝滿即飲一支再裝滿,最後都係飯晒,昂船洲係唯一一個有軍艦既軍營,順便影吓佢跟住又要趕去排隊睇文藝表演.早一個鐘到都係得翻最後三行位.

大纙大鼓,都幾好睇,好在有帶135mm來,有328當然好,不過冇可能咁重攞足一日.

幸好大部份都係大堆頭成個畫面都係人,都唔係好駛用好長焦距,但內容不停係愛國都幾骨痺.完場想睇吓仲有冇嘢食派,結果係冇既,求其影埋啲戰艦同直昇機就走翻屋企沖涼喇.

雞公嶺攝影

之前來過一次,搵咗好耐都搵唔到登山入口,結果無功而還,白行一趟.今次有人帶路,決定再去一次.

原來起咗個新入口,同小巴司機講話去登山入口直情唔駛搵,一路都係我最鐘意既樓梯級,好快就去到山腰既拍攝位置,睇書介紹山頂景觀更好,橫掂有時間就去睇睇,係就係角度高小小,但差別唔太大,而且後段路比較崎嶇,費事落山時搞咁耐,決定走翻去山腰,日落又是清水疍,冇所謂啦照影,用提前開燈大法加小小燈光上去冇咁齋.

由於另外兩個方向都有夜景,雖然麻麻地都好過冇,我冇等到個天真係好黑提早完成開燈大法,心急咗小小,其實個天未夠黑,始終都要影多張夾.

冇計喇,要趕埋呢邊,呢邊差唔多光喇,再咪魔呢邊就會太黑,天熱日落遲,落到山都已經8點.

夜探老朋友

又係時候去探吓蟲仔,今次裝備了新買既閃燈去熟習吓.

 

近幾年都係,蟲仔越來越小,我一路行到去亭度都係乜都冇,喺亭度搜尋吓,居然見到好多四腳蛇,可惜全部都係爬緊牆,又冇突出來,只可高抄影背脊,影完都剷咗算,好彩行前啲終於見到有竹節蟲,前幾年交尾都成山係,依家單隻都好似中交合彩咁.新閃燈冇乜時滯,只要啱位,好快就影完.

 

 

之後梗係影埋半身,新燈除咗反應快之外,最緊要係唔駛搭咁大個壇,機頂同平時咁就咁插支燈就得,腳架都小咁舊,穏陣好多,以前真係好驚拗爛個熱靴.

 

 

同竹節蟲玩飽之後就去水池位,上次就係呢度整爛咗個引閃,上天今次居然又安排過隻田雞俾我影,蹲低影咗幾張佢都冇走,為咗獲取最散既散景,決定叭地影,兩張就搞掂.主燈子燈都可以在機頂調輸出很方便.

 

 

搵咗一大輪都冇嘢影,終於先見到隻飛蛾,今次冇咁好彩可以打側影到佢既梳形觸角,只好正面硬幹,縮到F13都係得小小景深,想再影細啲,一陣強風吹過,冇得影.

 

 

睇睇個九巴app,依家落山慢慢行該差不多,再行翻去亭度竟然見到四,五隻好耐都未見過既大蜘蛛,當中只有一隻肯爬落低位,嗱嗱聲影佢一張大頭1:1,然後9秒9跑落山,架生都唔收直奔巴士站,否則趕唔切又要等多半粒鐘.

 

吊環瑜珈

有啲影厭咗就咁行行企企既人像相,見有呢個活動又去試吓.

見佢啲樣辦相係黑底,頭髮黐晒底唔係咁鐘意,就問自己可唔可以帶燈架去飛燈,結果係唔得,只可用機頂燈,都理解既,個個咁搞法邊有咁多地方擺燈架?結果我既諗法係錯既,背景根本就係黑布,係刻意要黑底,點打燈都係一樣.

就咁企地吓嗰啲就唔影喇,費事阻硬碟空間,影樓用閃燈影係唔同一般影法的,全靠閃燈,淨按快門就得.主持人提供既設定係ISO 400(可以理解唔駛支影樓燈咁吃力,快門1/125s(所有機應該都同步到,1/250s好多時要原廠燈先得),光圈F6.3-F7.1(足夠景深,對焦中個身已經可以).實際影我覺得偏暗,我鐘意光猛啲.最終我用咗F5. 中途主持會睇吓我地有冇問題,嘩,做乜你啲相咁光,睇到背景黑布穿咗崩,原來佢原意係個底要全黑.我唯唯諾諾最後都係影到咁光.

固定擺pose又用閃燈照計冇乜難度,影落先知原來都唔係咁固定的,個環會轉來轉去,又會搖前搖後,我用連續對焦都唔係張張得,而且用閃燈又大輸出唔可以用連拍,否則閃燈會過熱同回唔切電,只可以一張張影仲要唔好影得咁密.

影樓燈係靚,但人多用問題就來,一有人狂影其他人就會因回電未完成而曝光不足,主持人叫每人影三張就到第二個影,初初都做到,後尾又係亂晒大籠,有人索性用自己燈,狂影都得.不過咁就變咗直打,同兩支影樓燈一左一右光質差好遠.

Model真係好落力,唔駛休息咁,不過有啲高難度動作要定住每人影三張真係冇可能支持咁耐,結果就係全世界鬥快搶頭一閃,跟住慢小小既都係打空槍.我特登第一下唔影,根本都未擺好pose,搏回電後既第一槍,又俾我搏到,真係得一張,好彩中到焦,之後嗰啲都係回唔切電黑媽媽.最後我想講其實Model可以唔駛着咁小布啦,我只係想影吓個動作,搞到我都唔係好敢貼相.

再探天際100

上到咁高睇到既景係幾靚既,不過價錢真係離晒地,6月做推廣身份證有……唔記得乜嘢字就可以買一送一(其實都仲係好貴),咁就去多次啦.

上次用衣架遮光法都係覺得好論盡,所以今次淘咗個用吸盤既伸縮衣架用來掛黑布,範圍可以闊好多而且唔駛用一隻手攞住,不過唔知點解硬係見到自己倒影.日落好快就冇,冇時間慢慢搞,影咗至算,今日好好彩個天幾清,記得有次來係乜都睇唔到.有埋火燒天就好,世事冇咁理想.

順便影埋個夜景,見到旁邊有人用可以固定在鏡頭既反光板.有啲人仲大塊得好誇張.睇來好似幾work.後來朋友問佢地邊度買,原來係有得借,即係9.9秒跑去借啦.唔好意思,我地得翻最大嗰隻,啱晒,我就係想有咁大得咁大,結果,證實係冇用既.除非鏡頭貼實玻璃,否則經反光板反射既光線仲多過唔用.即刻俾翻佢用自己方法影,始終去唔晒啲反光.之後當然係影埋幻彩詠香江,好出奇今次只係得兩間大厦有激光出,而且係好散同唔多光嗰隻,影完都唔靚.事後回憶翻我上次係有遮住機背的,自己既方法自己都忘記咗,抵死.

一年一度影柔道

自從運動攝影栛會散咗之後,影柔道既機會就得翻一年一度既三叔體育節,其實捷青盃都可以去影既,不過水準差得太多,好多時等成日都冇乜快門機會.

試過搏矇去柔總的比賽,唔知係咪知我地意圖,個場set到好後,安排運動員在圍欄內排隊遮住水平角度,變咗只能夠在樓上觀眾席遠遠咁睇.體育節安排都一樣,但就留空咗旁邊一條行人路,可以喺嗰度影,夠近亦唔會有人阻.開齋先,可惜撻人嗰個被遮住,幸好仲見到個樣.

唔好睇小女仔,有幾吓幾精彩既都係女子組出現,睇唔到樣添,不過動作都幾好.

纏埋一舊,總算有兩腳都離地.

遲咗小小,已經到地,唔到地嗰啲個樣又矇,1/500秒都唔夠快.

今次撻人嗰個冇被人遮住,但係注意力硬係落咗去被人撻嗰個度,應該係只影到側面既原因,冇計,控制唔到.

全日最精彩就係呢一撻,真係估唔到會升到咁高,結果冇咗一忽腳,而且速度也太快,變得唔係好Sharp,早知既話幾大都再高小小ISO.