又去夜攝

疫情下乜鬼活動都冇晒,影吓生態都係唔多選擇既選擇.都懶得上松仔園,就近去吓鳳園就算.

諗住都係影吓蜻蜓,蜘蛛呢啲常客,點知好彩遇到螳螂,螳螂最難搞係對眼,凸出頗多,一影得大小小眼就會矇咗,正合練習用景深堆疊,影半身都係差小小,小咗中間嗰張,佢幾細隻,又有時會郁吓.細細張睇先OK.

再影全身,就比較容易.又到個身差咗小小,不過以我標準都算合格.

走前小小見到大蚊交尾,不過係垂直方式吊住,原本係好理想方便做散景,但郁來郁去實在冇可能影得到.原來係旺地,仲有另外一對,平放幾好影,不過缺點就係會有閃燈做成的陰影.

有班點紋既蟲,唔知點解要卷成咁.

都係蟲,好多毛好難搞.又係有大蚊既問題,有陰影,搞搞吓接近十點,出到去啱啱好有去大埔墟既車,但我去大埔中心方便啲,點知司機同我講尾班車走咗架喇,去大埔墟站啦.明明個站寫尾班車十一點喎,可能疫情關係提早咗.

再探狗肚山

上次去狗肚山遇啱大霧,啲相唔掂,見有小小陽光就諗住去影過啲好啲既.

點知行行吓又陰晒天,上到頂仲有小小雨粉,其實理智啲依家應該走人,陣間大雨就大件事.不過差小小又真係想影埋先,卒之就決定搏搏.其實個景都幾普通,今次冇大霧睇真咗.唔怪得冇乜聽見有人來.嗱嗱聲影咗就急急腳走人.上次來乜記號都冇做,走時發覺都幾多分义路.好彩落到山腳都冇落大雨.

黑丸情意結

去烏蛟滕好麻煩,朝早有加班小巴還可以,走既時候得幾班小巴.真係唔知啲人係咪行路走.不過星期日有巴士冇咁驚.

咁都要去係因為我仲未有一隻高清黑丸影到.手頭上既全部都係低光影,一唔係就唔啱焦平.有啲運,一去到就見到朋友影緊,位仲唔錯,雖然都係暗,但背景幾乾淨.高度啱啱可以用較穏定姿勢,大家都影完,可以慢慢來,真係好暗,用到1/80秒都要ISO 1600先夠光.貪心影大隻啲,景深超淺,要夾六張先夠景深.

一場來到梗係除咗黑丸都要影吓其他.有師兄話大紅葉嗰邊有寛鍔交尾,我連寛鍔都未見過,仲要係交尾,直情流晒口水,風大吹斜咗,啲人搞兩搞散咗,喊都無謂,好彩仲有怪獸交尾,靚就唔多靚架喇,好過冇啦.

行翻過黑丸嗰邊都冇乜其他收獲,又行翻轉頭,咦,又影緊交尾,不過就只有黃班弄,都好吖,影靚啲,正光搞到眼上又留下難睇既光班.本想轉去背光位影,但佢地郁郁吓,睇怕就散,都係影咗先等下轉,不出所料,未到我又已經散咗.

另類三門仔日出

網上介紹三門仔影日出都係小巴站行出去酒樓旁邊碼頭,優點係可以影到水平線日出(都要睇季節),但係前景只有一片大海同零星船隻.去咗幾次都係麻麻.

至於日落就個個都會去船灣避風塘防波堤,有浮屋同船仔做前景,但其實日出方向都唔錯,有好多船做前景,缺點係日出會被山阻住,要晏啲先見到,橫掂唔係好遠就試吓.構圖唔錯,日出就真係遲咗啲,好光,不過總體來講我都係鐘意呢度多啲,除非火燒天日出.

山寮雜錦

驚蟄過了很耐我先去了一趙山寮,往年太早去都係食白果,點知去到得我一個人,通常咁係代表冇嘢影,唔係好事.但事實上個表演台係有四五隻鳳蝶飲緊水.不過全部黑媽媽又拍緊翼,唔係好啱我口味.

等咗好耐都冇收獲就決定走人,可能上天見我太可憐,竟然在離開路上的水池邊見到佢地,初初以為係兩隻,睇清楚原來係三隻,唔知再下面仲有冇.

咦,呢隻小蟲都有啲色喎,影埋佢.

仲有最cheap既蝶,影埋啦,叫做有多張相.

龍鼓灘青苔

現今攝影好似打仗咁係要講情報,好多季節限定的風景一閃即冇.靠撞影到既機會幾乎等於零,今次就多得朋友通知我先知道龍鼓灘有青苔影.

天氣又係灰矇矇,成個龍鼓灘就得翻近發電廠嗰邊仲有小小青苔,應該都係水尾.好彩今日係水退,否則再過一個星期應該光晒頭喇.總算有小小收獲.

又影櫻花

上次去荔枝角公園影既櫻花麻麻,原來近我既大埔海濱公園仲靚,早知唔駛去咁遠.

入口冇遠己經有一排,不過係麻麻地,唔似網上見到嗰啲.入到回歸塔離遠已經望到最靚嗰堆,行過去就得.就咁影翻張背景乾淨小小既.

試吓背光影,充滿光線的感覺,但始終係好亂.

齋影花好悶,尤其呢排已經洗晒版,咁啱有人擺公仔,乘機抽水影翻啲.人地擺埋你影唔好意思咁多意見,雖然我喜歡淺色背景,但公仔白色頭髮其實深色背景會好啲.

另一個就好啲,頭髮冇黐底.不過呢個公仔有條鐡連住,以我道行,事後要執走佢都幾費力,另外要影全身都困難,仲要執走埋個底座,所以都係影半身算喇.

流浮山影日落

去下白泥時經過流浮山,據說也是影日落好地方,而且最近好似裝修過,最重要係唔驚冇車走.

首先要去搵大黃蜂,地方比想像中細,除咗大黃蜂,仲有個中秋節嗰陣喺小白鷺既月球,叮噹車仔,得支24-70mm,用盡70mm影,原來好多位可以後啲影的,早知帶支135mm來影.

影日落既話,大黃蜂個位認真麻麻,前景只有一片乜都冇既大海,可能潮退會好啲呱?不過我選擇去高啲既流浮山舊警署影.門口係封咗既,要去側邊鐡線網爛咗既地方潛入.見到警方封條不準前進就代表搵啱路.上到天台就可以獲得較好的視野.成擔心機來到,日落又係矇查查.

順手影埋個夜景,走既時候真係有啲入咗鬼屋既感覺,一屋爛嘢又黑媽媽.如果突然有個人走入來真係嚇死 :P

市區櫻花

早排香港處處櫻花盛開,於是就是但去比較近既荔枝角公園影吓.

知都知只係得幾棵,但原來花朵都頗疏落,背景又靚既都冇乜,求其影咗幾張近照就算.

來得呢度其實多數目的都唔係影花,一係雀加花,一係蝶加花,影雀似乎冇乜行,上面成排腳架加長炮停晒手,直情人都行開埋,得翻部機曬太陽,蝶係好多,不過只係得全年都有既報喜,由於係低炒,事實上要搵一隻啱焦平係一啲都唔易,十分考耐性.要背景乾淨就更加難,我冇乜耐性,所以只可以咁.

三聖村漁船

網上睇到過年期間,三聖村前面避風塘會堆滿休業漁船.不過嗰度冇乜自然高位影到,啱晒啦,好耐冇出動過航拍機,可以去用用.

一開機又話要更新,明明早一晚已經檢查咗,今次又話要更新禁飛區.無端端嘥咗啲電,終於起飛,飛到90米又出警告,風力太大,請盡快搵地方降落,唔係呱?咁遠來到,等一等冇咗警告,不過唔敢飛咁遠,求其近近地影咗就算.啲漁船一排排都幾得意.

飛得上去自然影多個唔同角度,航拍取景角度實在太好用,上山都冇辦法用咁角度影黃金海岸,遲吓冇得玩都真係有點可惜.