影西隧

上次去西九影聖誕樹經過呢度,覺得個景都唔錯,交通非常方便,一出九龍站E出口,行幾步上天橋就係.

同一般影風景唔同,個景係好闊,但反而唔可以用太wide.因為佢好似紅隧咁,前面有個屋簷.用wide鏡會影到佢,最後要zoom盡70mm先避到.呢個景比起紅隧都係差啲,可惜紅隧已經封咗鐡線網冇得影喇.

慢快門影武術

有室內武術影,唔係大賽,估計地方都好窄.果然真係窄到路都幾乎冇得行,好彩大會係冇乜限制我地拍攝位置,自己搞掂就得,最大問題係幾乎所有位背景都花到不堪,大光圈都幫唔到.

幾經努力先搵到個勉強可接受的位置坐低,武術之前已經影過好多次.今次冇乜高難度跳躍翻騰動作,啱晒要來試慢快門.唔知幾時開始,好多人既運動攝影就係等於慢快門,不過多數都係走火入魔,慢到乜都矇晒.我係保守派,運動員樣貌一定要清楚先收貨,所以效果也冇咁誇張,我見有人支棍可以轉到成個圈咁.

好小見既塵拂,對面嗰位攝影師咁既角度其實背景會係觀眾席,勁花,不過我都諗過坐嗰度,因為表演者面向評判,坐到我咁側好多時會影背脊,正面只有勁小機會,多數係影側面,但背景係觀眾席實在頂唔順,只好換位.

雙刀唔見咗一把,冇計,得呢張塊面清楚.慢快門之所以難得就係失敗率好高.所以有人會將標準降低,全部矇晒叫做有藝術感.開心便是.

都係棍有動感啲,其實仲有好多項目,不過慢快門成功率太低,要交相闗係,都要影翻啲快快門既相充吓數量先得架.

日落鋼線灣

呢排日日都係天陰陰,突然間有太陽,嗱嗱聲去影日落.夜晚冇堂食唔適宜搞咁晏,上山影埋夜景既話落得山來最快都七點幾,翻得屋企來分分鐘九點鐘先食到飯,要搵到影完日落就可以即走既地方.

鋼線灣其實我之前來過,不過嗰次搵唔到個燈塔,因為行行吓唔對路掉頭走咗,原來堅持行多一陣就到.拍攝過程好順利,呢個位肯定冇夜景影,一影完日落即刻急步去搭小巴走人.千算萬算,小巴架架都係滿座,等咗半個鐘先上到車.仲要堅尼地城搭一個鐘港鐡,結果都要八點半先食到飯.

影吊鐘花

呢排好多人都去影花,吊鐘花好似好有人氣,啲行山片條條都係講去睇吊鐘花.又去襯吓熱鬧.之前都影過吊鐘花,係好難影得靚,花本身都幾多葉,成堆影唔夠純色壯觀.就算特寫,如果唔向天影,都好難搵到個唔雜既背景.

仲有方法就係影得大啲,景深自然淺,但咁就連主體景深都唔夠,又係時候做景深堆疊,影花最大難度係驚有風,好彩影嗰度冇乜風,不過就好多人,而且個個唔戴口罩又多嘢講,路又好窄,有時成堆人哄埋來我都避避先再影.就算只係影一束花我都覺得有啲亂.

之後其實就棵棵都係差唔多.影埋個抵抄就收得工.

影得幾分鐘

今次影既劇目係大鬧廣昌隆,未影之前都覺得有啲奇怪.呢個劇目應該冇乜打戲,不過姑且一試.今次係去未去過既葵青劇院.睇平面圖仲大過高山劇場,咁支300mm分分鐘都唔夠長.....

去到係錯晒,原來平面圖將兩邊座位拉咗出來顯示,實際係同樓座重疊的.咁就問題喇.300mm幾乎爆框.135mm又好似短咗小小,唔理咁多,照影,分上下兩場,但上場全是文戲,個個停晒手.下半場鐘馗出場先冇咁悶,樓座角度始終有啲怪.

鬼仔一齊出場,這時只好用135mm影再裁,其實都OK.

跟住又來奪命狂講,終於去到眾鬼對付大奸角先開始有動作戲.雙鬼擒拿手你走唔甩喇.

衫都甩埋,有幾個跟斗影吓.

全鬼出動走唔甩喇,大會嗰支白色射燈真係玩死,又光又同背景唔同色,事後執餐死,精彩既畫面真係得幾分鐘,早知臨完場先來就得啦.新年流流講鬼好似唔多好,祝大家百無禁忌 :P

大山

聽講迪士尼下年會有翻煙花表演,原本上花瓶頂行過啲用長鏡都試過影到.不過想搵吓有冇啲近啲既位置.偶然發覺呢個地方可以影到迪欣湖.前段路線跟去昂船凹一樣,只係途中轉咗方向,上山路線難度一般,路線都好清楚,但係落山有幾個分义路,我估其中一個可能連接昂船凹.為免行錯路,都係挷條絲帶好啲.

天氣係多雲,估佢唔到,日落竟然有小小燒天,不過山頂位置遮晒,得個恨字.又係超大風,分分鐘又影到矇晒,好彩搵搵吓有個比較凹入既位置,而且前面冇咁多草.完成一張普通夜景.呢度都見到迪士尼的,不過側面有山唔靚,唔係好位.

食得唔好嘥,順便影埋另一個方向,冇乜特別,入夜後開始幾涷,嗱嗱聲落山買外賣先.

再探九逕山

都唔記得咗上次係幾時去過,路徑都忘掉,只係記得上次大煙霞,幾乎乜都影唔到,於是再上網搵搵路.我仲記得上次條路係好艱辛.今次睇到另一個入口只係長長天梯,啱晒我,不過睇真啲,影相位要由山頂再行翻落一段路,而嗰段路好似都唔容易.最大考慮係走嗰陣咪要先上再後落,咁不如直情喺另一邊上啦.

計劃好就出發,條路都有點崎嶇,對我來講還可以,話時話,會唔會就係我上次上來嗰條路,唔理咁多照上啦.終於到達.上次大煙霞我只用長焦特寫青山灣.今次能見度還可以,就來個Wide shot啦.入夜個天仲有小小紅,意外收獲.

粉嶺中心影相思

最近FB被粉嶺中心一棵紅花風鈴木洗版.交通咁方便當然要去啦.我都知實多人,七點半已經出到去,居然都已經有七個人喺度.

其實嗰度個個都唔係影花,係影雀.用翻上次招數.300mm F2.8加1.4x增距.再收到F5都應該夠用呱?但早上真係好暗.ISO 1600都係得1/160s快門,相思小小動作就矇,而且420mm都唔係好夠大,影完再勁裁好爛,影咗一輪都冇乜收獲,最後索性除走個增距,爭取最大入光量,不過咁就更加細粒,要勁勁裁,好彩有一隻飛到好近,咁先開齋.

佢重停咗幾耐,可以影埋唔同姿勢,其實除咗入光量唔夠,我發覺成日對唔到焦.查翻原來無反係冇咗十字對焦點呢回事的,中間嗰點反而單反仲容易對到,有好幾次,特別係近嗰啲都拉風箱,錯失好時機.

由於真係幾遠吓,基本上都要300mm裁到變600mm用,好彩新機像素高先可以咁玩.現場頗雜亂,多點對焦好易錯,結果用晒中間一點就算,影法非常白痴,見雀就影,全不用理會構圖,翻去先裁.

裁得咁勁會發覺啲毛冇飛得近嗰啲咁一條條,有啲黐埋一Pet.如果再用埋高ISO,跟手開埋勁Noise reduction.啲毛會變成一塊淨色,好似卡通片咁.

大石磨

上山路全是水泥路,又不高,可影到日落,啱晒唔想咁勞累既我.

不過雖說是水泥路,都幾斜吓.唔可以急上.最後原來有個大平台.又遇到影日落的決定,究竟係影多啲個天定地景好呢?通常我都喜歡地景多啲.因為天再靚都唔及地景有標誌性.不過呢度地景又真係麻麻,會影到好大忽山,我見啲雲又好似幾靚,就決定用個天佔大部份.

最後又係夜景啦.日落嗰邊麻麻,另一邊係魚塘加深圳景,但就好幼長,決定影近啲填滿個畫面多啲.走嗰陣原本有私家車話車埋我.不過行落山都好易我就婉拒咗.係呀,行上山既其實係車路,不過路好窄,有對頭車就會好麻煩.

越野電單車

好耐之前已經想影,一係唔啱時間,上年仲有埋疫情,咁多人聚埋好危險,終於今年先成事.都算黑仔,原來之前個場有部份地方係霸佔官地的,依家政府收翻,圍晒鐡線網,個場細咗三份一,仲唔止,以前可以企出官地遠距離影,現在只可在鐡線網內.

晨咁早去到先知道原來賽事係下午先開始,上午節目係影賽車女郎,嘩,啲賽車女郎真係正......

巡視吓個場,可以影車飛起既斜玻有兩個.矮嗰個一來唔夠斜,有機會就咁碌過去.而且前面一定塞滿人,除非諗住搵wide鏡影.即係成場得一個位最理想,計埋側小小最多五個,應該爭崩頭,陣間都係棒住盒飯食來霸位先得.影影吓女郎竟然有車聲.仲要係飛車,九秒九跑去影,好彩唔係太多人爭,趕得切執翻幾張.其實啲車飛得好遠架,應該十幾二十人都影到,但個場設計真係超低能,斜玻前面冇幾遠係一條柱,柱頂又拉咗線,即係柱後既全部有嘢遮.白白浪費好身手.

開心咗一陣,差唔多食飯又有車聲,原來玩剷泥,又冇乜人爭喎,起碼多一張相.

派飯竟然分先後,冇喇,啲好位俾人霸晒喇.連唔好既位都冇乜,大家餓得太耐,當日史無前例咁細個場,但史無前例咁多人,一共十二個團體,我地嗰個有四十六人,其他細啲,但估計都有超過二百人在場.場邊應該企唔晒,竟然係跑道邊都俾人企,萬一有意外.....大家唔駛爭位,我地分配,輪住影,我地組不幸安排在唔好位.諗住轉位先影,不過....原來飛車只有一場,轉位就得翻平路賽,搞搞吓仲落埋細雨,索性去副場影人轉彎就算,搞咗好耐都冇成堆車既畫面添.

有啲人開始走,這時有廣播,陣間會有飛車,即刻又衝去皇帝位,竟然冇乜人爭喎,今位影咗幾分鐘咋,我目的係影晒飛車架,平地嗰啲有個人話喺街邊影都得啦.先十五分鐘細車,又話啲細路手車幾辣,我覺得始終係細路囉.

到大車出場喇,咦,又係行平路既,唔係呱?見人小走數.乜飛幾吓真係好辛苦架咩?都係走喇.今日最後一個節目,影起步.大家會有三次機會.可能有人認為正面唔駛搖鏡,用高速快門好易搞掂.咁影係得,但會好似成堆車迫晒喺度咁.快門要慢到一定速度令車輪睇到係轉緊先算成功,其實快門唔快得搖鏡好多,但唔駛郁係會易啲既.